23 январь куни Ўзбекистон Республикаси товар-хом ашё биржасида 100 га яқин тендер савдолари амалга оширилди. «Дарё» мухбири Абдуқаҳҳор Қосимов ҳужжатларни мониторинг қилиб, энг эътиборга молик савдолар ҳақида маълумот беради.
Янги йил совғаси
Россия давлат нефть ва газ университетининг Тошкент шаҳридаги филиали 11 январь куни 165 та «Янги йил совғаси» учун 72,6 миллион сўмлик тендер ўтказган. Ҳар бир совғанинг бошланғич нархи 440 минг сўм этиб белгиланган.
18 январь куни якунланган тендер натижаларига кўра, Аrmada Azia Trade лотни ютиб олган. Шартнома суммаси — 59 миллион 400 минг сўм.
«Чилонзор» метроси учун 8 миллион долларлик ускуна
«Тошкент метрополитени» давлат унитар корхонаси «Чилонзор» линиясида интервал назоратини ташкил этиш ва ҳаракатланувчи таркибнинг хавфсизлигини таъминлаш учун махсус микропроцессорли блокировкалаш ускуналари (МПC) харид қилди. Лот маълумотларига кўра, ускуналарнинг яроқлилик муддати 24 ой, етказиб бериш муддати 365 кун бўлиши белгиланган. Харид маблағлари халқаро молиявий манбалар томонидан қопланиши кўзда тутилган.
Тендерни юридик манзили Москвада жойлашган «ТМХ Интеллектуалние Системи» МЧЖ ютиб олган. Шартнома суммаси эса 8 149 764 доллар.
Илҳомжон қизи вс Илҳомжон ўғли
Тошкент ирригация ва қишлоқ хўжалигини механизациялашган муҳандислари институтининг Қарши филиали ҳузуридаги академик лицей тайёр иссиқ овқат етказиб бериш бўйича аутсорсинг хизмати учун тендер ўтказган. Унда «Моҳичеҳра Илҳом қизи» ва «Сухроб Журақобилов 505» МЧЖлар рақобатлашган ва якунда «Моҳичеҳра Илҳом қизи» ғолиб деб топилган.
Очиқ маълумотларга кўра, ғолиб тадбиркорлик субъектининг манзили Қашқадарё вилояти Қарши туманида жойлашган. Раҳбари — Юсупова Улдон Муротовна.
Захира ғолиб МЧЖнинг таъсисчиси эса Журақобилов Сухроб Илҳом ўғли деб кўрсатилган. Сухроб Илҳом ўғли ва «Моҳичеҳра Илҳом қизи» ўртасида қандайдир боғлиқлик борлиги ҳақида маълумотлар мавжуд эмас.
Қариндошлар тендерни сохталаштирдими?
Жиззах вилоят Ногиронларни реаблитация қилиш маркази овқат етказиб бериш бўйича аутсорсинг хизмати учун 84 миллион сўмлик тендер эълон қилган. Унда «Яксарт Интер Импекс» МЧЖ ва «Мумин Ота 1954» МЧЖ рақобатлашган. Якунда иккинчи тадбиркорлик субъекти ғолиб деб топилган.
Тендер иштирокчиларининг раҳбарияти билан қизиқдик. Статистика агентлигига кўра, «Мумин Ота 1954» МЧЖнинг ягона таъсисчиси ва раҳбари Жўраев Акбаржон Мўминжонович ҳисобланади. Корхона манзили — Самарқанд вилояти Тойлоқ тумани.
Захира ғолиб «Яксарт Интер Импер» МЧЖнинг раҳбари эса Жўраев Тўлқинжон Мўминжонович. Тадбиркорлик субъекти Сирдарё вилояти Янгиер шаҳрида жойлашган.
«Дарё» мухбири ушбу икки тадбиркор ўртасида яқин қариндошлик муносабатлари бор бўлиши мумкин деган гумонда Акбаржон Жўраев билан боғланди. Унинг таъкидлашича эса, бу исмлари бир-бирига жуда ўхшаш инсонларнинг бир тендерда рақобатчи сифатида қатнашиб қолгани — оддий тасодиф. Акбаржон Жўраев сўзлари исботи сифатида унинг корхонаси Самарқандда, рақибиники эса Сирдарёда жойлашганини айтиб ўтди. Балки.
Бир хил фамилияли рақобатчилар
Хоразм вилояти Қўшкўпир туман 1-сон айрим фанлар чуқур ўрганиладиган ихтисослаштирилган мактаб-интернати аутсорсинг хизмати учун бошланғич қиймати 112 миллион сўмлик тендер ўтказган. Унда умумий тўртта иштирокчи қатнашган ва якунда «Янги Қўшкўпир» хусусий корхонаси тендерни ютиб олган. Фаст Фозилжон МЧЖ эса захира ғолиб сифатида кўрсатилган.
«Янги Қўшкўпир» ХКнинг таъсисчиси Жуманиёзов Равшанбек Мацодиқович. Раҳбар эса Бекчанов Давронбек Купалбаевич.
Қизиғи, Фаст Фозилжон МЧЖ таъсисчисининг фамилияси ҳам Бекчанов.
Бекчанов Илҳом ва Бекчанов Давронбекнинг қариндошчилик алоқалари бўйича маълумотлар йўқ.
Масъуллардан ушбу шубҳали тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.
Мавзуга доир: Ўзини ўзи енгган тадбиркор, қариндошига ёрдамлашган ҳакам, тугатилган корхонанинг иштироки — 20 январдаги шубҳали тендерлар
Изоҳ (0)