26 январь куни Ўзбекистон Республикаси товар-хом ашё биржасида 100 дан ортиқ тендерлар амалга оширилди. “Дарё” мухбири Абдуқаҳҳор Қосимов ҳужжатларни мониторинг қилиб, энг эътиборга молик савдолар ҳақида маълумот беради.
Мусиқий асбоб учун 90 миллион сўм
Қашқадарё вилояти Қарши шаҳридаги 9-сон болалар мусиқа ва санъат мактаби маримба мусиқий асбоби харид қилиш учун бошланғич қиймати 94 миллион сўмлик тендер ўтказди. Энг яхши таклифни танлаб олиш бўйича ўтказилган савдо 19 январдан 26 январгача давом этди.
Протоколга кўра, маҳсулотнинг яроқлилик муддати бир йил бўлиши, 10 кун ичида етказиб берилиши керак.
Тендерда иккита тадбиркорлик субъекти қатнашди: Sios Shams МЧЖ ва Humо Music МЧЖ.
Комиссия аъзоларининг якуний баҳоларига кўра, Humo Music МЧЖ 100 балл билан тендерни ютиб олган. Шартнома суммаси — 90 миллион сўм.
Ғолиб МЧЖ раҳбари ва устав фонддаги ягона таъсисчиси Субханов Санжар Наимкулович. Корхона Қашқадарё вилояти Косон тумани Косон шаҳри “Нартибаланд” маҳалласида жойлашган.
Захира ғолиб Sios Shams МЧЖ раҳбари эса — Каххаров Санжар Норқулович. Эътиборлиси, ушбу тадбиркорлик субъекти ҳам Қашқадарё вилояти Косон тумани Косон шаҳри “Нартибаланд“ маҳалласида жойлашган.
Бир фамилияли рақобатчилар
Самарқанд вилояти Нарпай туман халқ таълими бўлими умумий қиймати 60 миллион сўм бўлган иккита тендер ўтказган. Бири насос маҳсулотлари, бошқаси ҳаво сўрувчи вентилятор хариди учун.
Иккала тендерни ҳам “Хасанов Элбек Гранд” хусусий корхонаси ютиб олган.
Ушбу корхона раҳбари Хасанов Элбек Тахирович. Юридик манзили Самарқанд вилояти Нарпай тумани Оқтош шаҳрида жойлашган.
Вентилятор харид қилиш бўйича ўтказилган тендерда захира ғолиб сифатида кўрсатилган “Нарпай Брокер” хусусий корхонасининг раҳбари эса Хасанова Дилдора Улуғбек қизи. Тадбиркорлик субъекти Самарқанд вилояти Нарпай тумани Қорасийрак ҚФЙда жойлашган.
Хасанов Элбек ва Хасанова Дилдора ўртасида қариндошлик алоқалари борлиги ҳақида маълумотлар мавжуд эмас.
Тадбиркорнинг ўйини
Сирдарё Мурувват уйи овқат етказиб бериш бўйича аутсорсинг хизмати учун 330 миллион сўмлик тендер ўтказган. Унда “Инновацион Гўшт Сут Trade” ва New Inavatsion Pharm МЧЖлар ғолиблик учун курашган.
Комиссия аъзоларининг баҳоларига кўра, 100 га 78 балл билан тендерни “Инновацион Гўшт Сут Trade” ютиб олди. Шартнома суммаси — 317 миллион сўм.
Иштирокчиларнинг раҳбариятлари билан қизиқдик.
Очиқ маълумотларга кўра, ғолиб МЧЖнинг раҳбари ва таъсисчиси Қурбонов Обиджон Ўринович ҳисобланади.
Шубҳали жиҳати шундаки, тендерда унга рақобатчи бўлган New Inavatsion Pharm МЧЖ таъсисчиси ҳам айнан унинг — Қурбонов Обиджон Ўриновичнинг ўзгинаси.
Ҳолат юзасидан изоҳ олиш учун Обиджон Қурбонов билан боғланишга уриндик, аммо тадбиркор гўшакни кўтармади.
Масъуллардан ушбу тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.
Изоҳ (0)