Қашқадарё вилоят соғлиқни сақлаш бошқармаси бошлиғи, Dr Boboyev клиникаси раҳбари Алишер Бобоев Шаҳрисабздаги собиқ “электросет” биносини сотиб олгани ҳақидаги хабарлар эълон қилинди. Вилоят ССБ мазкур хабарлар юзасидан маълумот берди.
Унга кўра, марказ фаолияти банкдан олинган 500 минг АҚШ доллари миқдоридаги кредит эвазига йўлга қўйилган. Бу ерда урология йўналишида врачлар малакасини ошириш бўйича мамлакатда ягона нодавлат ўқув маркази ҳамда нодавлат тиббиёт муассасалари орасида ягона клиник ординатура фаолият кўрсатмоқда.
Клиника жамоаси ўз фаолиятини янада кенгайтиришга эҳтиёж сезмоқда. Бу борада хорижий ҳамкорлар билан музокаралар олиб борилмоқда. Жой масаласида муаммо кузатилгани сабабли очиқ тендерда, шаффоф тарзда Шаҳрисабз шаҳридаги собиқ электр таъминоти корхонаси биноси сотиб олинмоқда. Бу ерда келгусида кардиология ва трансплантация йўналишларида шифохоналар очилиши кўзда тутилган.
“Камбағалликни қисқартиришда тадбиркорлик субъектлари билан ўзаро манфаатли ҳамкорлик ўрнатишга қаратилган чора-тадбирлар тўғрисида”ги президент фармони асосида республика Камбағалликни қисқартириш ва бандлик вазирлиги томонидан Dr Boboyev Health Center МЧЖга энг кўп иш ўрни яратиш борасидаги ташаббуслари учун махсус имтиёзли сертификат тақдим этилган. Бу сертификат асосида МЧЖ бино учун тўланадиган маблағни 3 йил давомида бўлиб тўлаб бориш имкониятини қўлга киритган.
Тендер учун ариза бундан бир ой муқаддам берилган. Алишер Бобоев 2023 йилнинг 28 октябрь куни вилоят соғлиқни сақлаш бошқармаси бошлиғи этиб тайинланди. Қайд этилишича, бу бино соғлиқни сақлаш тизими тасарруфида эмас.
Изоҳ (0)