Самарқандда соғлиқни сақлаш муассасалари томонидан талон-торож қилинган 7 млрд сўм маблағ бюджетга қайтарилгани маълум қилинди

Самарқанд вилоятидаги соғлиқни сақлаш муассасалари томонидан 7 миллиард сўм бюджет маблағлари талон-торож қилингани хабар қилинган эди. Ушбу қонунбузилиш юзасидан Самарқанд вилояти ҳокимлиги Молия бош бошқармаси ахборот хизмати «Дарё»га вилоят Монополияга қарши курашиш бошқармаси, Давлат молиявий назорати бошқармаси ҳамда Молия бош бошқармаси томонидан ўрганилган текшириш хулосаларини тақдим этди.

Таъкидланишича, коронавирус пандемиясининг дастлабки даврида вилоятда коронавирус инфекциясига чалинган беморлар сонининг кескин ошиб кетиши ўз навбатида дори-дармон ва дезинфекция воситаларига бўлган талабнинг ортишига олиб келган. Натижада нархларнинг қимматлашишига ўз таъсирини кўрсатган. Бюджет муассасаларида беморлар сонининг кескин ошиб кетиши натижасида беморларга зарур дори-дармон ва дезинфекция воситаларини қисқа муддатларда етказиб бериш зарурати юзага келганлиги сабабли таъминотчи корхоналардан тендер савдоларисиз тўғридан-тўғри харид қилишни келтириб чиқарган.

2020 йил август ойидан бошлаб касалликка чалинган беморлар сонининг кескин камайиши ўз навбатида дори-дармон воситаларига бўлган талаб ҳамда нархларнинг пасайишига олиб келган. Ўрганиш натижасида, вилоятдаги соғлиқни сақлаш муассасаларида харид қилинган дори-дармон ва дезинфекция воситалари нархларида 5 миллиард 643 миллион 300 минг сўмлик тафовут қайд этилган.

Шунингдек, Самарқанд вилоят Давлат молиявий назорати бошқармаси томонидан пандемия даврида хизмат кўрсатган тиббиёт ходимларига қўшимча ҳақ тўлашда бюджет ташкилотлари томонидан меъёрий ҳужжатларнинг нотўғри қўлланилиши ва бошқа ҳолатлар натижасида 1 миллиард 384 миллион 200 минг сўмлик ортиқча харажатларга йўл қўйилганлиги аниқланган.

Жумладан, вилоят соғлиқни сақлаш бошқармаси тасарруфидаги тиббиёт муассасалари томонидан коронавирус инфекциясини даволашда иштирок этган тиббиёт ходимларига Вазирлар Маҳкамасининг 2020 йил 19 мартдаги фармонига асосан ходимларга ишлаган ставкадан ташқари ортиқча 130 миллион 600 минг сўмлик қўшимча тўловлар тўланган.

Тиббиёт муассасалари томонидан Вазирлар Маҳкамасининг 2020 йил 30 июлдаги «Коронавирус инфекцияси тарқалишига қарши кураш, аҳолининг санитария-эпидемиологик осойишталиги ва саломатлигини сақлашга жалб қилинган тез тиббий ёрдам ходимларини қўшимча моддий рағбатлантириш тўғрисида»ги қарори талабларига риоя қилинмасдан тез тиббий ёрдам чақирув бригадалари таркибида бўлмаган 48 нафар ходимга (кичик тиббий ходимлар, бўлим бошлиқлари, чақириқларни қабул қилувчи-узатувчи ҳамширалар, бўлим бекалари ва бошқалар) 324 миллион 500 минг сўмлик моддий рағбатлантириш тўловлари нотўғри тўлаб берилган.

Тиббиёт муассасалари томонидан ходимларга карантин тадбирларида иштирок этган даврида иш ҳақларини бюджетдан молиялаштириладиган барча вазирлик, идоралар ва муассасалар раҳбарларига юборилган кўрсатма хати талабларига риоя қилинмаслиги оқибатида 129 миллион 700 минг сўмлик маблағлар ходимларга ортиқча тўлаб юборилган.

Тиббиёт муассасалари томонидан Вазирлар Маҳкамасининг 2020 йил 19 мартдаги фармонига биноан «Коронавирус инфекцияси тарқалишига қарши курашиш тадбирларига жалб қилинган тиббиёт, санитария-эпидемиология хизмати ва бошқа ходимларни қўшимча моддий рағбатлантириш тартиби тўғрисида»ги вақтинчалик низом талабларига амал қилинмасдан 538 миллион 800 минг сўмлик маблағлар бошқа турдаги харажатларга мақсадсиз сарфланган.

Шунингдек, тиббиёт муассасаларининг ҳисоб варағида текшириш ўтказилган даврда 260 миллион 600 минг сўмлик маблағлар қолдиғи мавжудлиги аниқланган. Аниқланган ортиқча тўловлар тўлиғича ундирилиб, жамғармага тикланиши таъминланган.