Қашқадарё вилояти Косон тумани ободонлаштириш бошқармаси 15—25 март кунлари тумандаги марказий арчага безаклар сотиб олиш бўйича тендер ўтказди. “Дарё” ҳужжатларни мониторинг қилиб, лот маълумотлари ҳақида маълумот беради.
Лойиҳа смета ҳужжатларида ғолиб тадбиркор Косон туманида Янги йил байрами кўтаринки кайфиятда ўтказилиши учун 2023 йил ўрнатилган марказий арчага безак ва ўйинчоқлар етказиб бериши керак.
Техник топшириқ маълумотларига кўра, тендернинг бошланғич нархи 264 миллион сўм бўлиб, маҳсулот бир комплект сифатида олиб келинади.
Тендерда “Жахон Метал Профил” хусусий корхонаси ва “Машъал Ҳамкор Гранд” МЧЖ иштирок этди. Якунда 93 га 74 ҳисобида “Ж.М.П” ғолиб деб топилди. Шартнома суммаси — 262 миллион сўм.
“Дарё” мухбири нега март ойида Янги йил арчасини безатиш учун бунча маблағ сарфлангани бўйича изоҳ олиш учун ободонлаштириш бошқармасининг алоқа телефон рақамига қўнғироқ қилди. Аммо гўшакни ҳеч ким кўтаргани йўқ.
Изоҳ (0)