“Дарё” интернет нашрида Деҳқонобод туман ҳокимлиги тендер ўтказилгани, унда ҳокимликка тегишли бозор ғолиб чиққани ҳақида материал эълон қилинган эди. Ҳолат юзасидан туман ҳокимлиги муносабат билдирди.
Ҳокимликнинг маълум қилишича, Вазирлар Маҳкамасининг 2024 йил 30 октябрдаги “2024—2025 йиллар қиш-баҳор мавсумида аҳолининг ва ижтимоий соҳа ташкилотларининг асосий турдаги қишлоқ хўжалиги маҳсулотларига бўлган эҳтиёжини қондириш бўйича қўшимча чора-тадбирлар тўғрисидаги” 716-сонли қарори ижросини таъминлаш мақсадида Халқ депутатлари Деҳқонобод туман кенгашининг 2024 йил 4 декабрдаги VII-3-015-4-57-К/24-сонли қарори қабул қилинган.
Қарорга асосан маҳаллий бюджет маблағлари ҳисобидан туман ички бозорида нархларни барқарорлигини сақлаш ва аҳолининг асосий турдаги озиқ-овқат маҳсулотлари захирасини яратилишини ташкил этиш мақсадида узоқ муддат сақланадиган захира учун қишлоқ хўжалиги маҳсулоти (картошка) сотиб олиш белгиланган. Шунга кўра, “Давлат харидлари тўғрисида”ги ЎРҚ-684-сонли қонунининг 7-боби энг яхши таклифларни танлаш 56-моддаси талабларига асосан очиқ электрон танлов ўтказилган.
“Вазирлар Маҳкамасининг 716-сонли қарорига асосан буюртмачи Деҳқонобод туман ҳокимлиги томонидан очиқ электрон танлов ўтказишда техник шартлар қўйилган бўлиб, маҳсулот етказиб берувчи техник шартларга тўлиқ жавоб бериши керак бўлган.
Комиссия аъзолари томонидан ўрганилганда қўйилган техник талаблар ва шартлар бўйича Деҳқонобод “Деҳқон озиқ-овқат бозори” МЧЖ томонидан киритилган маълумотлар батафсил ёритилганлиги сабабли нисбатан юқори баҳоланган.
Иқтисодиёт ва Молия вазирлиги ҳузуридаги Ғазначилик хизмати қўмитасининг 2024 йил 18 ноябрдаги 01/09-35/277-сонли хатига кўра 2024 йил 24 декабрь куни тўғридан тўғри тузиладиган шартномалар натижаларини жойлаштиришнинг 2024 йилдаги сўнгги кунлари сифатида белгиланган, тендер 2024 йил 24 декабрда якунланган бўлиб, қонун талабларига кўра ўтказилган тендер натижалари тендер иштирокчилари ўртасида 2 кунлик муҳокама жараёнида бўлди. Муҳокама жараёни тугаганда жорий сана 2024 йил 26 декабрга тўғри келганлиги сабали ушбу тендер натижаси бўйича шартнома Деҳқонобод туман ғазначилик бўлинмасида рўйхатдан ўтказилмаган.
Яъни айтадиган бўлсак, бу тендер натижаларига кўра танловда ғолиб бўлган Деҳқонобод “Деҳқон озиқ-овқат бозори” МЧЖ билан шартнома белгиланган муддатда Деҳқонобод туман ғазначилик бўлинмаси томонидан рўйхатдан ўтказилмаганлиги сабабли тендер натижалари бекор қилинган ҳамда тез орада қайта тендер эълон қилиниши кўзда тутилган.
- Маълумот ўрнида, “Etender.uzex.uz” тизимида эълон қилинадиган очиқ танловларда Республикамизнинг исталган нуқтасида туриб, иштирок этиш ҳуқуқига эга бўлган ҳар қандай тадбиркорлар қатнашишлари мумкин.
- Шундан ҳам хулоса қилиш мумкинки, мазкур очиқ танловда ҳеч қандай манфаатлар тўқнашуви юзага келмаган”, дейилади муносабатда.
Изоҳ (0)