Венесуэла президенти Трампни унинг ҳаётига суиқасд уюштирганликда айблади

Венесуэла президенти Николас Мадуро АҚШ собиқ президенти Дональд Трампни 2018 йилда унга қарши суиқасд уюштирганликда айблади, деб ёзмоқда TeleSUR.

Венесуэла Миллий гвардиясининг 86 йиллигини нишонлаш маросимида Мадуронинг айтишича, Трамп ва унинг ҳукумати Колумбия собиқ президенти Хуан Мануэль Сантосга Мадуронинг ҳаётига суиқасд уюштиришни буюрган.

Унинг сўзларига кўра, Хуан Мануэль Сантос ўз президентлигининг сўнгги кунларида “террорчи гуруҳ тайёрлаш”ни молиялаштирган, суиқасддан бир неча кун олдин эса Венесуэла тез орада “қулаши ва режимни ўзгартириши”ни айтган.

Эслатиб ўтамиз, Мадурога суиқасд 2018 йилнинг 4 августида Каракасда Миллий боливар гвардияси ташкил этилганининг 81 йиллигига бағишланган тантанали маросимдаги нутқи вақтида амалга оширилган эди.

Венесуэла ички ишлар вазири Нестор Реверолнинг сўзларига кўра, суиқасд ташкилотчилари C4 портловчи моддалари билан тўлдирилган иккита дрондан фойдаланган. Ҳар бир учоқда тахминан бир килограмм портловчи модда бўлган. Дронлар мамлакат президенти минбарда турган Боливар проспекти бўйлаб учиши режалаштирилган. Президент гвардиясининг снайперлари яқинлашиб келаётган дронларни уриб туширган.

Хавфсизлик ходимлари Мадурони ўқ ўтказмайдиган жилет билан ўраб, минбардан олиб кетган. Президентнинг ўзи жабрланмаган, бироқ бир неча аскар яраланган.