Суд Трампга Капитолийга ҳужум ҳақидаги маълумотларни ошкор қилишни тақиқлади

Колумбия округи федерал судьяси Таня Чаткен АҚШ собиқ президенти Дональд Трампга 2021 йил январида Капитолийга уюштирилган босқин иши бўйича баъзи махфий маълумотларни ошкор қилишни тақиқлади, деб ёзмоқда The New York Times.

“Томонлар ёки уларнинг адвокатлари берадиган ноаниқ баёнотлар гувоҳларни қўрқитиш ёки потенциал суд ҳайъати аъзоларига зарар етказиш мақсадида талқин қилингудек бўлса, жараёнга хавф туғдириши мумкин”, — деди судья.

Огоҳлантириш бир ярим соат давом этган мажлис доирасида эълон қилинди, унда томонлар рухсат этилган маълумотларни ошкор қилиш кўламини муҳокама қилди – бу шундай жиноий ишларда одатий ҳол, деб ёзади нашр. 

Судья: Трампга чекловлар бошқа айбланувчиларники билан бир хил бўлади 

Reuters хабарига кўра, прокурорларнинг эътирозларига қарамай, судья Трампга баъзи махфий бўлмаган материалларни улашишга рухсат берган. Прокурорлар Трамп махфий далиллар тафсилотларидан гувоҳларни қўрқитиш учун фойдаланиши мумкинлигини таъкидлади ва буни собиқ президентнинг ижтимоий тармоқлардаги постлари билан изоҳлади. 

“У жиноий иш бўйича айбланувчи. У ҳам бошқа судланувчилар каби чекловларга эга бўлади. Бу иш одатдагидек давом этмоқда. Айбланувчининг сиёсий кампанияда иштирок этиши унга кўпроқ ёки камроқ ҳаракат эркинлигини бермайди” , — деб хулоса қилди Чаткен. 

Трампга учта алоҳида иш бўйича айблов қўйилган

Мажлисда кўриб чиқилган айбловларни махсус прокурор Жек Смит август ойининг бошида илгари сурганди. Собиқ президент 2020 йилги президентлик сайлови натижаларини бекор қилишга уринишда айбланган. У фуқароларнинг ҳуқуқларини бузиш, ҳукуматни алдаш мақсадида тил бириктириш, расмий тартиб-қоидаларга тўсқинлик қилишда айбланмоқда. 

Айблов версиясига кўра, 2021 йилнинг 6 январида Трамп ва унинг шериклари президентлик сайловларидаги сохталаштиришлар ҳақида ёлғон баёнот тарқатиш, шунингдек, зўравонлик ва тартибсизликларни келтириб чиқаришга ундаш орқали расмий овоз бериш натижаларини бекор қилишга уринган. Махсус маслаҳатчи Жек Смитга кўра, айнан Трампнинг ёлғонлари Капитолийга ҳужумга сабаб бўлган бўлиши мумкин.

Бу Трампга қўйилган учта айбловдан биридир. Бундан ташқари, собиқ президент актриса Сторми Дениелсга алоқалари ҳақида сукут сақлаши учун пул тўлаганини яширганликда ва ўз қароргоҳида махфий ҳужжатларни нотўғри сақлаганликда айбланган. Трамп барча айбловларни рад этмоқда.