АҚШ президенти Дональд Трамп Иордания, Миср ва бошқа араб давлатларини Ғазо секторидан қабул қилаётган фаластинлик қочқинлар сонини кўпайтиришга чақирди. Бу ҳақда Associated Press хабар берди.
Трамп фикрича, урушдан хароб бўлган ҳудудни “тозалаш” учун аҳолининг етарли қисмини кўчириш керак. У буни Иордания қироли Абдулла II билан телефон орқали мулоқотда муҳокама қилганини айтди. 26 январь куни эса Миср президенти Абдулфаттоҳ ас-Сисси билан ҳам шу мавзуда гаплашмоқчи.
Мен у одамларни қабул қилишини хоҳлардим. Миср уларни қабул қилишини истардим. Эҳтимол, 1,5 миллион киши ҳақида гап кетяпти. Биз шунчаки тартиб ўрнатиб, ҳаммаси ортда қолди, деймиз, деди у.
Шу билан бирга, у Иордания қиролини кўплаб фаластинлик қочқинларни қабул қилгани учун мақтади.
Бирор нарса бўлиши керак. Аммо ҳозир бу том маънода вайроналар макони. Деярли ҳамма нарса вайрон қилинган, одамлар ўлиб кетяпти, дея Трамп Ғазо секторидаги ҳозирги вазиятни назарда тутди.
У бу вазиятда фаластинлик қочқинларга Ғазо ташқарисида уй-жой қуриш учун баъзи араб давлатлари билан ҳамкорликни афзал кўришини айтди.
Трамп Исроилга бомбалар юборишни тиклади
У Байденнинг Исроилга 2000 фунтлик бомбаларни юбориш бўйича жорий этган тақиқини бекор қилди. Бу Исроил ва ҲАМАС ўртасидаги уруш пайтида тинч аҳоли қурбонлари сонини камайтиришга қаратилган босимни йўққа чиқаради. АҚШ президенти тақиқни бекор қилиш қарорини қуйидагича изоҳламоқда:
Улар бомбаларни узоқ вақтдан бери кутишаётган эди. Чунки уларни сотиб олишган, деб жавоб берди сиёсатчи.
ҲАМАС муносабати
Фаластиннинг ҲАМАС ҳаракати Ғазодагиларни кўчириш таклифига жавобан араб давлатларига мурожаат қилди.
Биз барча араб ва ислом давлатларини, айниқса, Миср ва Иорданияни фаластинликларнинг ўз ерларидан мажбуран кўчирилишини рад этишдан иборат қатъий позициясини яна бир бор билдиришга чақирамиз, дейилади ҲАМАС баёнотида.
Ҳаракат, шунингдек, янги Америка маъмуриятидан бундай таклифларни илгари суришни тўхтатишни талаб қилди, чунки бу фақат Исроил манфаатларига хизмат қилиши таъкидланди. Бунинг ўрнига, фаластинликларнинг барча ҳуқуқларини, шу жумладан, пойтахти Қуддус бўлган мустақил давлат қуриш ҳуқуқини амалга оширишлари учун ишлашни талаб этди. Ҳозирча Миср ва Иордания Трампнинг таклифига муносабат билдирмади.
Изоҳ (0)