АҚШ президенти Жо Байден Жон Кеннедининг 63 ёшли қизи Кэролайн Кеннедини мамлакатнинг Австралиядаги элчиси лавозимига номзод қилиб кўрсатишни режалаштирмоқда, деб ёзмоқда Axios янгиликлар портали.
Шунингдек, Байден АҚШнинг 35-президентининг укаси, сенатор Тед Кеннедининг беваси Викторияни Ғарб давлатларидан бирига мамлакатнинг дипломатик ваколатхонаси раҳбари лавозимига номзодини кўрсатиш имкониятини муҳокама қилмоқда.
Нашрнинг маълум қилишича, Байден Американинг энг таниқли сиёсий сулоласини яна диққат марказига олиб чиқишни ва шу тариқа марҳум устози ва дўстига ҳурмат кўрсатишни мақсад қилган.
Бу масала бўйича Оқ уйдан расмий изоҳ берилмаган.
Кэролайн Кеннеди биринчи навбатда АҚШнинг 35-президенти Жон Кеннедининг қизи, кейин дипломат, адвокат ва ёзувчи сифатида танилган бўлиб, 2013 йилда у АҚШнинг Япониядаги биринчи аёл элчисига айланган ҳамда ҳарбий ва савдо алоқаларни, мамлакатлар ўртасида талабалар алмашинуви дастурини ўрнатган. АҚШнинг собиқ президенти Дональд Трампнинг инаугурация маросимидан аввалроқ Кэролайн ушбу постни тарк этган.
Кэролайн Кеннеди Нью-Йоркдаги Convent of the Sacred Heart рим-католик қизлар мактабини ва Массачусетсдаги Concord Academy мактабини тамомлаган. 1980 йил у Гарвард университети қошидаги Рэдклифф Истиқболли тадқиқотлар институтда санъат соҳасида бакалавр даражасини олган, 1988 йилда эса Колумбия университетида юридик фанлар доктори бўлган.
Изоҳ (0)