Норвегиялик депутат Мариус Нилсен сўз эркинлигини ҳимоя қилишдаги фаолияти учун Илон Маскни Тинчлик учун Нобель мукофотига номзод қилиб кўрсатди. Бу ҳақда Daily Mail хабар берди.
Депутат Илон Маск номзодини у “мулоқот, сўз эркинлиги ва ўз фикрларини билдириш имкониятини қатъий ҳимоя қилгани” учун илгари сурганини айтди. Нилсен миллиардернинг Starlink сунъий йўлдош тармоғига ҳам тўхталиб ўтди. Норвегиялик сиёсатчининг сўзларига кўра, ундан Украинада фойдаланиш жангчиларга “мулоқот қилиш, мувофиқлаштириш ва Россия ҳужумига қарши туриш” имконини беради.
“Маск асос солган, эгалик қилган ёки бошқараётган кўплаб технологик компаниялар жамиятни яхшилашга, Ер ва коинот ҳақидаги билимларни кенгайтиришга ҳамда бутун дунё бўйлаб ва ўзаро алоқаларни таъминлашга қаратилган. Улар дунёни янада узвий боғлаб, хавфсиз жойга айлантиришга ёрдам берди”, — дейди Нилсен.
Март ойида Нобель қўмитаси барча таклиф этилган номзодларни кўриб чиқади ва қисқа рўйхатни тасдиқлайди.
2023 йили Тинчлик бўйича Нобель мукофоти эронлик ҳуқуқ ҳимоячиси Наргиз Муҳаммадийга аёллар зулмига қарши кураши учун берилган эди.
Изоҳ (0)