Америка пойтахти Вашингтонга сайланган президент Жо Байденнинг инаугурацияси чоғида тартибни таъминлаш учун Миллий гвардиянинг 25 минг нафар захирадаги хизматчиси етиб келди, деб ёзади «Интерфакс».
«Раҳбарлик қилувчи федерал агентликларни қўллаб-қувватлаш учун бу ерга Миллий гвардиянинг 25 минг ҳарбий хизматчиси жойлаштирилди», — деди Миллий гвардия бюроси раҳбари армия генерали Дениел Хокансон.
«Ҳарбий хизматчилар ўзларига юклатилган ҳар қандай вазифаларни бажаришга тайёр», — дея таъкидлади генерал.
Унинг айтишича, ҳарбий хизматчилар қуролланган. Бундай қарор ҳуқуқ-тартибот органлари кўрсатмасига биноан қабул қилинган.
Пойтахтга Американинг барча 50 та штат ва ҳудудларидан захирадаги хизматчилар, техника ва юкларни ташиб келтириш учун 150 дан ортиқ авиарейс амалга оширилган.
Пойтахт маъмуриятининг маълум қилишича, тартибни таъминлашга Колумбия округи полициясининг бутун шахсий таркиби – 5,8 минг киши жалб қилинган.
Вашингтонда инаугурация арафасида радиацион, кимёвий ва биологик ҳимоя бўйича махсус бўлинмалар жойлаштирилиб, улар оммавий қирғин қуроллари қўлланиши билан боғлиқ ҳолатларга жавоб беришга шай ҳолга келтирилган. Оммавий қирғин қуроллари қўлланилиши билан боғлиқ воқеаларга жавоб кўрсатишга тайёр Атлантика зарбдор гуруҳи каби махсус отрядлар ҳам жалб қилинган.
Инаугурация вақтида хавфсизликни таъминлаш бўйича операцияга АҚШ махфий хизмати раҳбарлик қилади. Бундан ташқари, операцияга Федерал қидирув бюроси (ФҚБ)нинг кўп сонли агентлари жалб қилинган.
Айни пайтда Вашингтон маркази тўлиқ ўраб олинган. Барча давлат муассасалари бинолари қўриқланиши кучайтирилган. Вашингтоннинг марказий туманларидаги метро станциялари ёпилган. Потомак дарёсидан ўтувчи бош кўприклар ҳам тўсилган. Бундан ташқари, АҚШ соҳилбўйи қўриқлаш хизматининг бир неча ўнлаб катери ёпилган туманларга сув орқали кирилишига йўл қўймаслик учун Потомак ва Анакостия дарёларида патруллик қилмоқда.
Шунингдек, шубҳали сузиш мосламаларини кўздан кечириш учун масофадан бошқарилувчи роботлар қўлланмоқда. Портловчи моддаларни излаш учун хизмат итлари жалб қилинган.
Потомак дарёси бўйида кимёвий, биологик ва радиацион ҳужум ҳолатида юқори мансабдор шахсларга биринчи ёрдам кўрсатувчи ходимларни дезактивациялаш қурилмалари ўрнатилган кўк рангли чодирлар жойлаштирилган.
Мавзуга доир:
Изоҳ (0)