АҚШ президенти Жо Байден маъмурияти Колумбия федерал округининг 51-штатга айланишини расман маъқуллади. Бу ҳақда The Washington Times хабар берди.
Вакиллар палатаси шу ҳафтада округнинг палатада бир нафар вакилга, сенатда эса икки нафар сенаторга эга бўлишини кўриб чиқувчи қонунчилик учун овоз бериши керак.
«Жуда узоқ вақт давомида Вашингтон, Колумбия округининг 700 мингдан ортиқ аҳолиси АҚШ Конгрессидаги тўлиқ ваколатидан маҳрум қилиниб келаётган эди», — дейилади Бюджет ва маъмурий сиёсат бошқармасининг хабарида.
Маълумот учун, 2020 йилда Вакиллар палатаси Колумбия округини 51-штатга айлантириш тўғрисидаги қонун лойиҳасини қабул қилган эди, лекин у кейинчалик республикачилар бошқарувида бўлган Сенат томонидан рад этилди.
Республикачилар партиясининг вакиллари бундай ўзгаришга қарши чиқмоқда, чунки улар буни шунчаки демократларнинг Конгрессдаги ваколатларини оширишга бўлган уриниши деб ҳисоблайди.
Бугунги кунда Колумбия округида Вермонт ва Ваёминг штатларига қараганда кўпроқ аҳоли истиқомат қилади ва шу билан бирга, унинг аҳолиси 22 та штатдан кўра кўпроқ федерал солиқларини тўлайди. Ушбу округ Вашингтон шаҳри билан биргаликда, Америка пойтахтининг ҳеч бир штатга бўйсунмаслиги учун ташкил этилган.
Бунгача АҚШда янги штатлар 1959 йилда ташкил этилиб, Аляска 49, Гавайи 50-штатга айланган эди.
Изоҳ (0)