Дональд Трампнинг АҚШ ҳокимиятига келиши муносабати билан Аmazon компанияси ирқий, гендер тенглик ва инклюзивликни таъминловчи “DEI” дастуридан воз кечишга қарор қилди.
Аmazon ўзининг оммабоп веб-сайтларидан ишчиларни ҳимоя қилишга қаратилган бир қатор сиёсатларни, жумладан, қора танли ходимлар билан бирдамлик ваъдаларини ва трансгендер ходимлар учун тиббий ёрдам имтиёзларини шов-шувсиз олиб ташлади, дейилади The Washington Post хабарида.
Қайд этилишича, Аmazon ушбу дастурларни “эскирган ва сиёсий воқеликка мос келмайдиган” деб тан олган.
Нашр маълумотларига кўра, саҳифалар тахминан бир ой олдин ўчирилган. Ўзгаришлар бир нечта сиёсатларга, шунингдек, бўлимларнинг номларига ҳам таъсир кўрсатган. Илгари “Хилма-хиллик, тенглик ва инклюзивлик” деб номланган бўлим энди “Инклюзив тажриба ва технологиялар” деб аталмоқда, “DEIни технологиялар орқали ривожлантириш” бўлими эса энди “ходимлар тажрибасини такомиллаштириш” ваъдасига айланган.
Алоҳида гуруҳлар учун дастурлар яратиш ўрнига, биз тасдиқланган натижаларга эга дастурларга эътибор қаратамиз ва биз ҳам корпоратив маданиятимизни ривожлантиришга интиламиз, дейилади компания ички ҳужжатида.
Жорий йилнинг 20 январидан президентлик лавозимига киришган Трамп АҚШ сиёсатидаги муҳим ўзгаришлар ҳақида гапирар экан, турли гендерларни ижтимоийлаштириш, уларни одамлар ҳаётига тиқиштиришдан воз кечишини таъкидлаб ўтганди.
Шу ҳафта жамоатчилик ва шахсий ҳаётнинг ҳар жабҳасига турли гендерларни тиқиштиришга уринишдан иборат бўлган давлат сиёсатига чек қўяман. Биз ранг-барангларни ёқтирмайдиган ва қадр-қимматга асосланган жамиятни яратамиз. Бугундан бошлаб АҚШ ҳукуматининг расмий сиёсати фақат икки жинс — эркак ва аёл жинси бор деб тан олишдан иборат бўлади, деди АҚШ президенти.
Аввалроқ АҚШ Конгресси Вакиллар палатаси спикери Майкл Жонсон Оқ уйда қилган чиқишида АҚШ бундан буён ўз сиёсатида фақат икки жинслилик тамойили асосида ҳаракат қилишини маълум қилганди.
Эркаклар ҳеч қачон аёлга айлана олмайди. Бу ҳақда гапиришга мажбур бўлаётганимиз ачинарли. Бу биология масаласи. Биз яратилишдан эркак ёки аёл қилиб яратилганмиз. Агар биз буни тан олмасак ёки буни рад этишга ҳаракат қилсак, ўзимиз хавф остида қоламиз, қизларимизга эса зарар келтирамиз, деди у.
Жо Байден бошқаруви пайтида сиёсатчиларнинг бундай чиқишларини учратиш амримаҳол бўлган.
Изоҳ (0)