“Халқ банки” Сурхондарё вилояти Бойсун, Узун, Музработ ва Олтинсой туманларида жойлашган банк биноларини таъмирлаш бўйича тендерлар ўтказгани, уларда ака-укаларга тегишли қурилиш компаниялари рақобатлашгани ҳақида хабар берилган эди.
Мазкур ҳолат юзасидан Коррупцияга қарши курашиш агентлиги матбуот котиби Шерзод Сапаров муносабат билдирди.
Таъкидланишича, агентлик томонидан “Халқ банки” томонидан ўтказилган танловларда ўзаро аффилланган шахсларга тегишли тадбиркорлик субъектлари иштирок этганига оид хабар тегишли тартибда ўрганиб чиқилган.
“Ўрганишда танловларда иштирок этган тадбиркорлик субъектлари — ғолибликни қўлга киритган “Чинор” хусусий корхонаси ва “Тошкент-Термиз-Қурилиш” МЧЖ ҳақиқатан ҳам ўзаро аффилланган шахсларга тегишли эканлиги ўз тасдиғини топди.
Мазкур давлат харидлари “Давлат харидлари тўғрисида”ги ва “Рақобат тўғрисида”ги қонунлар талабларига зид равишда ўтказилган.
Агентлик томонидан юқоридаги қонунбузилиши ҳолатларини бартараф этиш ва келгусида олдини олиш юзасидан Ўзбекистон Республикаси Марказий банкига тақдимнома киритилди.
Шунингдек, давлат харидлари тўғрисидаги қонунчилик бузилишига йўл қўйган шахсларни тегишли жавобгарликка тортиш мақсадида тўпланган ҳужжатлар ҳуқуқни муҳофаза қилувчи органга юборилди”, — дейилади агентлик ахборотида.
Аввалроқ “Дарё” “Халқ банки” 13–19 декабрь кунлари бошланғич нархи салкам 626 млн сўмлик қурилиш бўйича тендер ўтказгани, унда комиссия аъзолари ғолибга ён босган бўлиши мумкинлиги ҳақида ёзганди.
Эътиборли жиҳати, ушбу тендер ғолиби ҳам “Тошкент-Термиз-Қурилиш” масъулияти чекланган жамияти ҳисобланади.
Изоҳ (0)