Рақобатни ривожлантириш ва истеъмолчилар ҳуқуқларини ҳимоя қилиш қўмитаси Термиз давлат педагогика институтининг 2 млрд сўмлик тендери натижалари бекор қилинганини маълум қилди.
Қўмитанинг Сурхондарё вилояти ҳудудий бошқармасига Термиз давлат педагогика институти томонидан 11 июлда бошланғич қиймати 2 миллиард сўмлик тендер савдоси ўтказилгани юзасидан мурожаат келиб тушган.
Мурожаатга асосан олиб борилган ўрганишда, буюртмачи (Термиз давлат педагогика институти) томонидан институтининг янги қурилаётган ўқув биносига мебеллар харид қилиш учун бошланғич қиймати 2 002 382 125 сўмлик танлов савдоси ўтказилгани аниқланди.
Мазкур тендер савдосида, буюртмачи ташкилот (харид комиссияси) томонидан иштирокчилар (“Стеклопластик” МЧЖ, “Глобал Тех Пром Сервис” МЧЖ, “Муҳаммадали савдо саноат сервис” МЧЖ, “Фаровон-Файз” ХК, НЕАТЕСТ МЧЖ ва “Омад Хамрох Мезон” МЧЖ) тақдим этган танлов таклифларини баҳолаш мезонларининг нисбий қиймати ишлаб чиқилмагани маълум бўлди.
Ишни кўриб чиқиш натижасида, “Рақобат тўғрисида”ги қонунининг 29-моддаси талаблари бузилиши аломатлари юзасидан Термиз давлат педагогика институтига нисбатан иш қўзғатилиб, ишни кўриб чиқиш якуни бўйича қўмита кўрсатмаси билан тендер савдоси натижалари бекор қилинди.
Изоҳ (0)