Тошкент инвест компанияси “Пулли тўхташ жойлари” дастурини яратиш учун қарийб 8 млрд сўм маблағ сарфлайди

“Тошкент инвест компанияси” акциядорлик жамияти 14—20 декабрь кунлари бошланғич нархи салкам 8 миллиард сўмлик тендер ўтказди.

Платформага жойланган техник топшириқ ҳужжатида шаҳарда транспорт воситалари тўхтаб туриш жойларини бошқариш, улардан фойдаланишни автоматлаштириш учун дастурий таъминотни яратиш, техник қўллаб-қувватлаш ва модернизация қилиш белгиланган. Хизматларни кўрсатиш муддати шартнома имзолангандан бошлаб 270 календарь куни ҳисобланади. 

“Пулли тўхташ жойлари” ягона ахборот тизимини яратиш учун таклиф қилинган бошланғич нархи 8 миллиард 225 миллион 757 минг 968 сўм  этиб белгиланган.

Лотни ютиб олиш учун иккита – Россиянинг Intermobiliti масъулияти чекланган жамияти ҳамда  Streetpark Systems компанияси иштирок этган.

Якуний натижага кўра, лойиҳага 6 миллиард 780 миллион сўм таклиф қилган Streetpark Systems МЧЖ 100 балл билан ғолиб деб топилган. Intermobiliti эса  97.8961 балл билан захира ғолиб сифатида кўрсатиб ўтилган. Баённомага комиссия аъзоларининг 6 нафари розилигини, 1 нафари эса бетарафлигини билдирган.

Маълумот учун, Streetpark Systems компанияси 17 декабрь куни ўтказилган аукцион савдоси якунларига кўра, Тошкент кўчаларида автомобилларнинг пулли тўхтаб туриш жойларини ташкил этиш ҳуқуқига эга ҳисобланади.

Ғолиб компания ҳақида

Streetpark Systemс 2024 йилнинг 13 ноябрида рўйхатга олинган. Компания таъсисчиларидан бири — Кудратбек Дилшадович Якубов бўлиб (Leader Great Trade, Аziz Export 777, Prime Аvtо Consulting МЧЖларига ҳам эгалик қилади), у 75 фоиз улушга эга. Қолган 12,5 фоизи Венгриянинг iCell Mobilsoftт Zrt ва Каsy Park компанияларига тегишли.

“Газета.уз”нинг ёзишича, Тошкентда пулли автотураргоҳлар ташкил этиш ҳуқуқи учун ўтказилган биринчи аукционнинг асосий ва захира ғолиби ер ижараси бўйича шартнома имзоламагани сабабли уларнинг ғолиблиги бекор қилинган. 572 миллион сўм миқдоридаги омонат куйиб кетган Balcomuz компанияси 12 ойга аукционларда иштирок этишдан четлатилган. Захира ғолибининг ҳам омонати куйиб кетган.

Тошкентда пулли тўхташ жойлари

Тошкентда автомобиллар учун йўл бўйларида пулли тўхташ жойлари ташкил этилиши ҳақида 2021 йилда маълум бўлганди. Ўшанда “Тошкент шаҳар транспорти ва йўл-транспорт инфратузилмасини 2025 йилгача ривожлантириш концепциясини тасдиқлаш тўғрисида”ги Вазирлар Маҳкамаси қарори лойиҳасида пойтахтдаги тирбандликларни, марказий кўчаларда транспорт оқимини камайтириш, автомобилларнинг йўл бўйида бетартиб тўхташини тартибга солиш мақсадида ягона автомобиль йўл бўйи пулли тўхташ жойлари тизимини ташкил этиш зарурлиги айтилганди.

Дастлаб 10 та марказий кўчада пулли автомобиль тўхташ жойлари тармоғи пайдо бўлиши эълон қилинди.

Президентнинг 2022 йил 2 февралдаги қарорига мувофиқ, 2022 йилда 10 та марказий кўчаларда, яъни Глинка, Братислава, Миробод, Авлиё ота, Тарас Шевченко, Саид Барака, Моштабиб, Фидокор, Содиқ Азимов ва Якуб Колас кўчаларида давлат-хусусий шериклик асосида автомобилларнинг автоматлаштирилган йўл бўйи пулли тўхташ жойларини ташкил этиш белгиланди.

2024 йил 16 октябрь куни Шавкат Умурзоқов Тошкент шаҳрида транспорт воситаларининг пулли тўхтаб туриш фаолиятини янада такомиллаштириш чора-тадбирлари тўғрисидаги қарорни имзолади. Ҳужжатда пулли тўхтаб туриш жойларидан фойдаланганлик учун тўловлар миқдори ҳам тасдиқланди. Паркинг ҳудудлари 5 та тариф зонасига бўлинади.

Бир соатлик тўхтаб туриш нархлари:

• 1-тариф зонасида 12 минг сўм;
• 2-тариф зонасида 10 минг сўм;
• 3-зонада 8 минг сўм;
• 4-зонада 6 минг сўм;
• 5-тариф зонасида 5 минг сўмни ташкил қилади.

Паркинг транспорт воситаларини сақлаш учун мўлжалланмаган. У ерда учинчи шахслар томонидан транспорт воситаларининг олиб қочилиши ва шикастланиши хавфи автомобиллар эгалари зиммасида қолади.

Ижарага бериладиган майдонларнинг умумий ҳажми 262,8 минг квадрат метрни ташкил этади. Бунда қуйидаги кўчалар қамраб олинади:

• Тошкентнинг марказий қисми (жумладан, Амир Темур хиёбони, Мовароуннаҳр, Истиқлол, Яҳё Ғуломов, Ўзбекистон овози, Истиқбол, Содиқ Азимов, Тарас Шевченко, Шаҳрисабз, Яккачинор, Шастри, Маҳатма Ганди, Ҳамид Олимжон, Чехов ва бошқа кўчалар);
• Учтепа ва Чилонзор туманлари (Кичик ҳалқа автомобиль йўли, Фарҳод, Лутфий, Чўпонота, Муқимий, Қатортол, Чилонзор, Арнасой, Есенин, Бешқайрағоч кўчалари);
• Сергели ва Янгиҳаёт туманлари (Янги Сергели, Турсунзода, Алавия, Шокирариқ, Ислом Сатторов, Қипчоқ, Қўрғонтепа, Биродарлик кўчалари);
• Олмазор ва Шайхонтоҳур туманлари (Лабзак, Себзор, Гулобод, Форобий, Белтепа, Қорақамиш, Қорасарой, Шимолий Олмазор кўчалари);
• Бектемир тумани (Ҳусайн Бойқаро кўчаси);
• Миробод тумани (Янги Қўйлиқ кўчаси);
• Яшнобод тумани (Оҳангарон йўли кўчаси, Қуйи Толариқ, Сивец, Қурувчилар кўчалари).

2024 йил 19 январда “Йўл ҳаракати тўғрисида”ги қонун президент томонидан имзоланганди. Қонунда пулли тўхтаб туриш жойларининг эгалари ушбу жойлардан фойдаланганлик учун тўлов миқдорини Қорақалпоғистон Вазирлар Кенгаши, вилоятлар ва Тошкент шаҳар ҳокимликлари томонидан Иқтисодиёт ва молия вазирлиги билан келишилган ҳолда белгиланадиган чекланган миқдорлардан юқори бўлмаган тарифлар бўйича мустақил равишда белгилаши қайд этилган.