Fransiyaning Baluchon kompaniyasi tomonidan ishlab chiqilgan Cardabelle nomli ixcham va funksional uy tashqi ko‘rinishidan kichik bo‘lsa-da, uning ichki qismni hayratga solishi shubhasiz. Uzunligi 6 metr bo‘lgan ushbu harakatlanuvchi mobil uyda ikki kishi yashashi uchun barcha sharoitlar mujassam.
Cardabelle loyihasi ikki o‘qli, dvigatelsiz tirkama ustida qurilgan. Uning devorlari qizil qarag‘ay daraxti va alyuminiy bilan qoplangan. Uyning karkasi archa daraxtidan, issiqlikni ushlab turuvchi qoplama esa qayta ishlangan paxta, zig‘ir va kanopdan tayyorlangan. Mobil xonadonning ixcham hajmi uzoq masofaga sayohat qilishni yaxshi ko‘radiganlar uchun qulaylik yaratadi.
Old eshik uyning mehmonxonasiga olib kiradi. Unda derazalar soni ko‘pligi tufayli xonalar torligi sezilmaydi. Chap tomonda divan-krovat qo‘yilgan, uning ichki qismida turli predmetlarni saqlash joyi mavjud. Divan tepasida bir nechta javonlar qo‘yilgan.
Uyning pastki qavatdagi aksariyat qismi oshxonadan iborat. Fransiyaning mitti uylar standartlariga ko‘ra, mazkur xonadon did va mahorat bilan jihozlangan. Oshxonada pech, muzlatgich, ikkita konforkali gaz plitasi, rakovina va bir nechta javonlar mavjud. Bundan tashqari, ish stoli va ikki kishilik bar stollari ham joylashgan. Uning ostida noutbukdan foydalanish uchun alohida stolcha yashiringan.
Cardabelle uyidagi hammom mehmonxonaning qarama-qarshi tomonida o‘rnatilgan. U yerga oshxona orqali kirib borish mumkin. Hammom dush, rakovina va hojatxona bilan jihozlangan. Mazkur uyda ikki kishilik yotoqxona mavjud va unga qutilar shaklidagi zinapoya orqali chiqiladi.
Baluchon kompaniyasiga tegishli bunday uylarning narxi odatda 90 ming AQSH dollaridan boshlanadi. Cardabelle uyining narxi hozircha noma’lum.
Izoh (0)