Арманистон ҳукумати Европа иттифоқига кириш жараёнини бошлаш ҳақидаги қонун лойиҳасини маъқуллади.
Аrmeniya News нашрининг ёзишича, Ташқи ишлар вазири Арарат Мирзоян қонун лойиҳасини тақдим этар экан, бу фуқаролик ташаббуси эканлигини таъкидлади.
Аввалроқ мазкур қонун лойиҳаси 50 мингдан ортиқ имзо тўплагани маълум қилинганди.
У ҳукуматни “ижобий позицияни билдиришга” чақирди, чунки сўнгги йилларда Арманистон ва Европа иттифоқи ўртасида “жуда қизғин ва динамик” муносабатлар ривожланди. Бундан ташқари, Европа иттифоқи ҳам Арманистоннинг иқтисодий барқарорлигини мустаҳкамлашга ёрдам беришга тайёрлигини билдирди.
Миллий ассамблея (парламент) томонидан ҳали овозга қўйилмаган қонун лойиҳаси Европа Иттифоқига тўғридан-тўғри киришни англатмайди: бу масала фақат референдум орқали ҳал қилиниши мумкин.
Арманистон бош вазири Никол Пашинян таъкидлаганидек, ҳукумат ўз қарори билан фуқаролик ташаббусига “эътироз билдирмаслигини” кўрсатди.
“Қонун қабул қилингандан сўнг биз Европа Иттифоқи билан улар тасаввур қиладиган ва биз тасаввур қиладиган йўл харитасини муҳокама қилишимиз керак”, деди Пашинян.
Арманистоннинг бу қарорига Россиянинг муносабати қандай?
Кремлнинг таъкидлашича, Арманистоннинг Европа иттифоқига қўшилиши унинг суверен ҳуқуқидир, аммо бир вақтнинг ўзида икки хил ташкилотга аъзо бўлиш мумкин эмас.
“Арманистоннинг Европа иттифоқига аъзо бўлиши нимани англатади, ҳозир айтиш қийин, чунки бир вақтнинг ўзида икки хил ташкилотга аъзо бўлиш мумкин эмас”, деди Россия президенти матбуот котиби Дмитрий Песков Арманистоннинг Евросиё иқтисодий иттифоқига аъзо эканига ишора қилиб.
“Албатта, бу Арманистоннинг суверен ҳуқуқи, биз Евросиё иқтисодий иттифоқига аъзо бўлиш фойдалироқ эканини биламиз”, дея қўшимча қилди Песков.
Пашинян ва Лукашенко ўртасидаги келишмовчилик
Арманистон бош вазири Никол Пашинян коронавирусга тест натижаси ижобий бўлгани сабабли 26 декабрь куни Санкт-Петербургда бўлиб ўтган МДҲ давлатларининг норасмий саммитига бормаганди. У йиғилсиҳда видеоалоқа орқали қатнашди.
Мазкир саммитда Лукашенко кейинги йиғилиш ва Евросиё иқтисодий форумини май ойи охирида Минскда ўтказишни таклиф қилди. Бунга жавобан Пашинян қарши эмаслигини айтди. Бироқ у йиғилишда делегацияси видеоконференция тарзида қатнашишидан огоҳлантирди.
Сизда қандай муаммо бор, Минсккача узоқми ёки сизни олиб борадиган одам йўқми? Делегациянгизни етказиб беришни ташкил қиламиз-ку, дея эътироз билдирди Лукашенко.
Пашинян бу масала юзасидан оммавий баёнот берганини айтди. У Арманистондаги амалдорларнинг Беларусга ташриф буюриши тақиқланганини назарда тутди.
Бу баёнот ўз кучида қолмоқда. Менимча, бу масалаларни муҳокама қилиш учун тўғри жой эмас, деди у.
Пашинян Беларусь президенти таклифига муносабат билдирганини, ҳеч қандай тушунмовчилик бўлишини истамаслигини айтди.
Хўп, биз сизнинг баёнотингизни кўриб чиқамиз, деди Лукашенко.
Бунга жавобан Пашинян кўриб чиқадиган ҳеч нарса йўқлигини ва умуман олганда Беларусь президенти унинг баёнотини кўриб чиқа олмаслигини айтди.
Менинг баёнотим кўриб чиқилиш ваколатингиз йўқ, дея таъкидлади у.
Изоҳ (0)