Коррупцияга қарши курашиш агентлиги Соғлиқни сақлаш вазирлиги бир корхона таъсисчилари иштирокида 435 миллион сўмлик тендер ўтказгани масаласини ўрганди. Бу ҳақда агентлик матбуот котиби Шерзод Сапаров маълум қилди.
Ўрганишда харид жараёнида “Давлат харидлари тўғрисида”ги қонуннинг 42- (иштирокчини харид қилиш тартиб-таомилларида иштирок этишдан четлатиш шартлари) ва 46-моддалари (давлат харидлари жараёнидаги чекловлар) талаблари бузилгани аниқланиб, тўпланган ҳужжатлар қонуний қарор қабул қилиш учун Иқтисодиёт ва молия вазирлиги ҳузуридаги Давлат молиявий назорати инспекциясига юборилган. Агентлик ушбу масала натижаси бўйича қўшимча маълумот берилишини қўшимча қилган.
“Газета.уз” нашри Соғлиқни сақлаш вазирлиги ўз эҳтиёжлари ҳамда тиббиёт форумларига ташриф буюрадиган меҳмонларга совға қилиш учун кундалик, блокнот, ручка, папка, қоғоз пакет, флешка, канселярия тўплами ва бошқаларни харид қилгани, 435 миллион 700 минг сўмлик тендерда қатнашган икки тадбиркор ҳам бир корхонага биргаликда эгалик қилиши ҳақида ёзганди.
Харид комиссияси протоколига кўра, май ойида ўтказилган тендерда иккита иштирокчи қатнашган бўлиб, улардан биринчиси Brессо масъулияти чекланган жамияти ҳисобланади. Мазкур жамиятнинг барча улуши Жалолиддинов Хусомиддин Хусниддин ўғлига тегишли. Компаниянинг устав фонди 2 миллиард 245 миллион 850 минг сўм бўлиб, амалга ошираётган фаолият тури сифатида соатлар ва улгуржи буюмлар савдоси кўрсатилган. Иккинчи иштирокчи эса якка тартибдаги тадбиркор Миршавкатов Мираъзам Анвар ўғли бўлган.
“Orginfo.uz” сайти маълумотларига кўра, уларнинг иккиси ҳам камида 2023 йил 10 июлгача Apriori Trade МЧЖ таъсисчилари ҳисобланган. Ҳозирга келиб эса мазкур корхона улуши Жалолиддинов Хусомиддин Хусниддин ўғлига тўлиқлигича ўтган.
Тендерда иштирокчиларни манфаатлар тўқнашуви мезони бўйича баҳолашда харид комиссияси уларнинг ҳар иккисига 5 баллдан 1 балл қўйган. Лекин шунга қарамай, тендер ўтказилган деб топилган.
Аввалроқ Тошкент вилояти Ихтисослаштирилган соматика шифохонаси томонидан бошланғич қиймати 500 миллион сўмлик шубҳали тендер ўтказилиб, кўп ўтмай бекор қилингани ҳақида хабар берилганди.
Изоҳ (0)