Рақобатни ривожлантириш ва истеъмолчилар ҳуқуқларини ҳимоя қилиш қўмитаси тендер савдоларида “Рақобат тўғрисида”ги қонун талаблари бузилганини аниқлади.
Қайд этилишича, қўмитанинг Тошкент шаҳар ҳудудий бошқармаси томонидан ўтказилган ўрганишлар давомида “Тошкент гидроэлектрстанциялари каскади” унитар корхонаси томонидан махсус ахборот порталига 4-ГЭС ҳудудида жойлашган ОТҚ-35кВни бошқа жойга кўчириш бўйича бошланғич нархи 958 миллион сўмга яқин бўлган эълон жойлаштирилган.
Ушбу махсус ахборот порталига жойлаштирилган харид савдоси бўйича белгиланган ишларни бажариш учун учта талабгорлар: Маster Engineering Services МЧЖ (950 миллион сўмлик), Jass Engineering МЧЖ (952 миллион сўмлик) ва “Электр энерго тармоқ қурилиш” МЧЖ (912 миллион сўмлик) томонидан таклифлар келиб тушгани ва ушбу тендер савдосида буюртмачи ташкилот (харид комиссияси) томонидан иштирокчилар таклифларини баҳолаш мезонларини белгилашда айрим камчиликларга йўл қўйилгани аниқланган.
Юқоридаги ҳолатлардан келиб чиқиб, “Тошкент гидроэлектрстанциялари каскади” унитар корхонасига нисбатан “Рақобат тўғрисида”ги қонунининг 29-моддаси иккинчи қисм, биринчи ва учинчи хатбошиси талаблари бузилганлиги аломатлари юзасидан Вазирлар Маҳкамаси қарори билан тасдиқланган низомига асосан белгиланган тартибда иш қўзғатилиб, натижаси бўйича молиявий жарима қўлланилган.
Аввалроқ нархларни сунъий ошириш йўли билан катта миқдорда даромад олган “Навоийазот” АЖга нисбатан чора кўрилгани тўғрисида хабар берилганди. Минерал ўғитлар бозорида нархларни асоссиз оширган “МАХАМ-Чирчиқ”га нисбатан иш қўзғатилган эди.
Изоҳ (0)