“Рақобат тўғрисида”ги қонун талабларига риоя этилиши юзасидан 2023 йилда ўтказилган ўрганишларда қарийб 15 минг истеъмолчининг манфаатлари ҳимоя қилинган. Бу ҳақда Сенатда Рақобатни ривожлантириш ва истеъмолчилар ҳуқуқларини ҳимоя қилиш қўмитасининг 2023 йил якуни бўйича ахбороти эшитилди.
Таъкидланишича, табиий монополия субъектлари сифатида Давлат реестрига киритилган 135 та хўжалик юритувчи субъект қайта хатловдан ўтказилиб, рақобат муҳитини бузганлиги аниқланган 46 таси Давлат реестрдан чиқарилган.
Давлат буюртмачилари томонидан ўтказилган 62 минг 465 та танлов (тендер) савдоларини таҳлил қилинган. Шундан:
- 27 минг 730 та рақобатга зид ҳаракат аниқланган;
- 24 минг 18 таси ҳуқуқни муҳофаза қилиш органларига чора кўриш учун юборилган;
- 2 минг 688 та ҳаракат бўйича қўмита томонидан иш қўзғатилган;
- 485 нафар мансабдор шахс маъмурий жавобгарликка тортилган.
Сенаторларнинг сўзларига кўра ҳисобот даврида Қўмита томонидан ижтимоий аҳамиятга эга маҳсулотларнинг истеъмол бозорларидаги нархларини барқарорлаштириш чоралари тўлиқ кўрилмаган.
Давлат харидларини амалга оширишда самарали рақобат шароитини яратишга, давлат ва корпоратив буюртмачилар томонидан тендер (танлов) савдоларини ўтказишда рақобатга зид бўлган ҳаракатларнинг олдини олишга эришилмаган.
Буюртмачилар томонидан 18 минг 738 та (30 фоиз) савдо жараёнида 27 минг 730 та рақобатга зид ҳаракат аниқланган холос.
Иқтисодиётда рақобат ҳолатини чуқур таҳлил қилиш, корхоналар фаолиятида рақобат қонунчилигига амал қилинишини ўрганиш борасида Қўмита билан вазирликлар ўртасида маълумот алмашинуви тўлиқ йўлга қўйилмаган, — дейилади юқори Палата ахборотида.
Қўшимча қилинишича, ҳанузгача 10 та вазирлик, 7 та қўмита ҳамда 16 та агентликда монополияга қарши комплаенс тизими жорий этилмаганлиги танқид қилинди.
Изоҳ (0)