Республика Маънавият ва маърифат маркази “qadriyatim.uz”, “tanlov.manaviyat.uz” сайти ва мобил иловасини яратиш хизмати учун 1,3 миллиард сўмлик (102 минг доллар) тендер ўтказгани ҳақида хабар берилган эди.
Платформага жойланган, марказ директори Отабек Ҳасанов имзолаган ҳужжатда ёзилишича, мазкур маблағ дастурий таъминот ва маҳсулотлар ишлаб чиқиш, ахборот технологиялари соҳасида консалтинг хизматларига сарфланади.
Мазкур хабарлар юзасидан Республика Маънавият ва маърифат маркази муносабат билдирди.
Маълум қилинишича, 2023 йилнинг 22 декабрида президент томонидан ўтказилган йиғилишда билдирилган таклиф ва ташаббусларни амалиётга кенг жорий этиш ва соҳани янада ривожлантириш бўйича дастур ишлаб чиқилган. Мазкур дастурнинг 10-бандида мамлакат аҳолисининг ўзига хос қадриятлари, урф-одат ва анъаналарини ўзида акс эттирган “Миллий қадриятлар атласи” китоб-альбоми, сайти ва мобил иловасини яратиш вазифаси белгиланган.
Мазкур вазифа ижросини таъминлаш мақсадида тегишли вазирлик, идораларнинг малакали мутахассисларидан иборат ижодий гуруҳ шакллантирилиб, “qadriyatim.uz” порталини яратиш таклифи берилган.
“Мазкур таклифдан келиб чиқиб, “Давлат харидлари тўғрисида”ги қонунга асосан, “e-tender” махсус электрон порталида 915 210 000 сўмлик энг яхши таклифларни танлаб олиш танлови эълон қилинган. Унга кўра, интерактив шаклда энг замонавий ахборот технологияларидан фойдаланиб, номоддий маданий меросимиз, халқимизнинг ўзига хос урф-одатлари ҳақидаги батафсил илмий маълумотларни жойлаштириш имконини берадиган учта тилдаги платформа ва мобил илова яратиш шартлари қўйилган.
Шунингдек, унда мамлакатимиз туризм салоҳиятини ошириш мақсадида хорижий сайёҳлар учун миллий маҳсулотларимизни топиш, энг диққатга сазовор жойларнинг манзиллари ҳақида билиш имкониятини яратиш ҳам назарда тутилган.
“tanlov.manaviyat.uz” платформаси ва уларнинг мобил иловасини яратиш таклифлар танлови эса президентнинг 2024 йил 21 февралдаги “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида”ги фармонининг 1-иловаси 98-бандида белгиланган вазифалар ижросини таъминлаш мақсадида эълон қилинган. Бунда жамиятда замонавий билимларни оширишга қаратилган қизиқарли тест саволларини ўз ичига олган ютуқли ўйин ва викториналарнинг махсус платформасини, уларнинг мобил иловасини яратиш назарда тутилган.
Мазкур вазифа ижросини таъминлаш мақсадида юқоридаги тартиблар асосида “e-tender” махсус электрон портали орқали 369 640 000 сўмлик энг яхши таклифларни танлаб олиш танлови эълон қилинган ва ўтказилган”, дейилади хабарда.
Қўшимча қилинишича, танловларда иштирок этиш хоҳишини билдирган иштирокчилар орасидан ғолибни танлаш тегишли қонун ҳужжатларида белгиланган тартибга асосан мажбурий тартибда электрон шаклда ўтказилган.
Танловларни ўтказишда очиқлик ва шаффофлик, рақобат ва холислик, коррупцияга йўл қўймаслик принципларига амал қилинган, дейилади хабарда.
Изоҳ (0)