Yamanning El-Bayda provinsiyasidagi yoqilg‘i quyish shoxobchasi (AYQSH) va gaz omborining portlashi oqibatida 10 kishi halok bo‘ldi, 65 kishi turli jarohatlar oldi. Bu haqda Yemen Online xabar berdi.
Zahar tumanida sodir bo‘lgan portlash zanjirli reaksiyaga sabab bo‘lgan. Oqibatda qo‘shni ikkita yoqilg‘i quyish shoxobchasi va yaqin atrofdagi tijorat omborlari yonib ketgan. Portlash paytida yonilg‘i quyish shoxobchasida mijozlar ko‘p edi. Bu tartibsizlikka olib kelgan, odamlar yonayotgan majmuani tark etishi qiyinlashgan.
Mahalliy hukumat vakilining so‘zlariga ko‘ra, yonilg‘i quyish shoxobchasidagi portlash oqibatida kamida 10 kishi halok bo‘lgan va 65 dan ortiq kishi jarohatlangan.
“Rasmiylar portlashning sababini hali ham o‘rganmoqda, bu noaniq bo‘lib qolmoqda”, deya xabar berdi Yemen Online.
17-dekabr kuni Farg‘ona shahridagi ko‘p yonilg‘ili AYQSH va AGQSH shoxobchasida portlash va yong‘in sodir bo‘lgandi. Suyultirilgan gaz to‘kish vaqtida texnologik jarayonlarning buzilishi hamda texnika xavfsizligi qoidalariga rioya qilinmasligi oqibatida chaqnash sodir bo‘lgan, undan so‘ng yong‘in yuzaga kelgan.
Yong‘in oqibatida dastlab bir nafar fuqaro vafot etgani, 4 nafar fuqaro tan jarohati olgan, 8 nafar fuqaro tibbiyot xodimlari nazoratida ekani ma’lum qilingan. Keyinroq yana 3 kishi shifoxonada vafot etgan.
Holat yuzasidan Jinoyat kodeksining 257-moddasi (mehnatni muhofaza qilish qoidalarini buzish) 3-qismi “a” bandi hamda 259-moddasi (yong‘in xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, jinoyat ishi doirasida 5 kishi qamoqqa olindi.
Izoh (0)