Яман ҳусийлари 30 апрель куни Қизил денгизда Грецияга қарашли савдо кемасига ҳужум қилди. Бу ҳақда Arab News нашри хабар берди.
Воқеа ҳақида дастлаб Британия денгиз агентлиги ва АҚШ ҳарбий қўмондонлиги маълум қилган. Кейинроқ ҳусийлар ҳарбий воизи юнон тижорат кемасига ҳужумга алоқадорликни тан олган.
АҚШ Марказий қўмондонлиги маълум қилишича, ҳусийлар 30 апрель куни Малта байроғини осиб юрган юнон савдо кемаси MV Cyclades’ни учта баллистик ракета билан нишонга олган. Ҳужум оқибатида кемага қисман зарар етган.
Ҳужум оқибатида жароҳатланганлар ва ҳалок бўлганлар ҳақида маълумот йўқ. Кема ҳужумдан сўнг ўз йўналишида давом этган.
Аввалроқ Буюк Британия денгиз хавфсизлиги агентлиги Яман қирғоқлари яқинида сузиб кетаётган тижорат кемасига яқин нуқтада портлашлар содир бўлгани ҳақида хабар берган эди. Портлаш манбаси ва талафот ҳажми ҳақида айтилмаган.
Сўнгги ҳафтада Ямандаги “Ансоруллоҳ” ҳаракати Жибути портидан Жиддага йўналган кўплаб савдо кемаларига ракета отган. Бунга сабаб сифатида ушбу кема операторлари Исроил билан савдо қилиши келтирилган.
Изоҳ (0)