АҚШ давлат котиби Энтони Блинкен ўтган ҳафта Ямандаги Америка элчихонаси биносига ҳужум уюштирган хусийлардан дипломатик миссиянинг маҳаллий ишчиларини озод этишни ва элчихона ҳудудидан чиқиб кетишларини талаб қилди. Бу ҳақда Америка ташқи сиёсий идораси матбуот хизматига таяниб, «ТАСС» хабар берди.
«Хусийлар зудлик билан АҚШ томонидан ёлланган қуролсиз яманлик ишчиларни озод қилиши, элчихона ҳудудини тарк этиши, эгаллаб олинган мулкларни қайтариши ва таҳдидларни тўхтатиши зарур», — дейилади хабарда.
Давлат департаменти раҳбари Америка дипломатик миссиясида ишлаган яманликларнинг қўлга олиниши ва уларга ёмон муносабатда бўлинаётганини қоралаган. Блинкен юзага келган вазият бўйича «халқаро ҳамкорлар, жумладан, БМТ Хавфсизлик Кенгаши аъзолари билан яқиндан маслаҳатлашаётганини» таъкидлаган.
Хусийлар 11 ноябрь куни АҚШнинг Ямандаги элчихонасига ҳужум қилиб, бинони эгаллаб олган. Ҳужум оқибатида дипломатик ваколатхонанинг 25 нафар ходими қўлга олинган, уларнинг барчаси Яман фуқаролари ҳисобланади. Американинг Санодаги элчихонасининг ўзи 2015 йилдан бери ишламайди.
Аввалроқ Яманнинг Мариб шаҳрига амалга оширилган ракета зарбалари оқибатида 29 киши ҳалок бўлгани тўғрисида хабар берилганди.
Изоҳ (0)