Экваториал Гвинеядаги базада юз берган портлашлар оқибатида 20 киши ҳалок бўлиб, 400 дан зиёд одам жароҳатланди (видео)

Экваториал Гвинеянинг энг йирик шаҳри Батадаги ҳарбий базада содир бўлган портлашлар оқибатида камида 20 киши ҳалок бўлди ва 400 дан ортиқ одам жароҳат олди. Бу ҳақда маҳаллий AhoraEG нашрига таяниб, «РБК» хабар берди.

Биринчи портлаш 7 март куни маҳаллий вақт билан соат 13:45 да (Тошкент вақти билан 17:45 да) содир бўлган. Шундан сўнг, бир ярим соат ичида камида яна учта портлаш, соат 17:44 да эса бешинчи кучли портлаш, сўнгра яна бир нечта кичик портлашлар юз берган.

Учинчи портлашдан сўнг, воқеа жойига фавқулодда хизмат ходимлари келишни бошлаган, улар ярадорларни ва вайроналар остида қолган одамларни олиб чиқишган. Нашрнинг ёзишича, жароҳат олганлар сони 420 кишига етган, 20 киши вафот этган.

Экваториал Гвинея ташқи ишлар вазири Симеон Ангуэ Батадаги вазиятни ҳалокатли деб атади ва дипломатик каналлар орқали халқаро ёрдам сўради.

Reuters хабарига кўра, портлаш содир бўлган ҳудудда барча биноларнинг томлари учиб кетган ва аксариятининг деворлари қулаган. Экваториал Гвинеядаги Испания элчихонаси (Марказий Африка мамлакати илгари Испаниянинг мустамлакаси бўлган) ўз фуқароларидан уйда қолишни сўраган.

«Бата шаҳри бепарволик ва эҳтиётсизлик оқибатида содир бўлган фожианинг қурбонига айланди. Бу ўқ-дорилар, динамит ва бошқа портловчи моддаларни сақлаш учун масъул бўлинма ходимларининг айбидир. Қўшни фермер хўжаликларида пайдо бўлган ёнғин ҳарбий базага туташган ва натижада портлаш келиб чиққан», — деди президент.

Республика раҳбари воқеани чуқур ўрганиб чиқишни ва зарарни баҳолашни буюрганини айтди. У шаҳар аҳолисини хотиржам бўлишга чақирди, шунингдек ёрдам сўраб халқаро ҳамжамиятга мурожаат қилди.

Аввалроқ Афғонистон ва Эрон чегарасида жойлашган божхона постида 500 дан ортиқ транспорт воситаси ёниб кетгани ҳақида хабар берилганди. Қайд этилишича, бензин ташувчи автомобиль («бензовоз»)нинг портлаши ёнғинни келтириб чиқарган бўлиши мумкин.