Лас-Вегасдаги Трамп меҳмонхонаси ёнида 1 январь куни Cybertruck портлатилди. Буни амалга оширган шахс амалдаги америкалик ҳарбий хизматчи бўлиб, армия махсус кучларда хизмат қилган. Бу ҳақда полиция ва ҳарбийларга таяниб, BBC хабар берди.
37 ёшли Меттю Ливелсбергер махсус разведка кучларининг сержанти бўлган. Терговчилар у ва Янги йил кечасида Янги Орлеанда 15 кишини машинада босиб кетган ҳарбий Шамсуддин Жабборнинг таржимайи ҳолидан бир нечта ўхшашликларни топди. Аммо Ливелсбергер ва Жаббор таниш бўлгани ҳақида маълумот йўқ.
Лас-Вегас шерифи Кевин Макмахилл ёниб кетган пикапдан Ливелсбергернинг ҳарбий гувоҳномаси ва паспорти, шунингдек, унинг номига ёзилган бир нечта кредит карталари, иккита тўппонча, айфон ҳамда соат топилганини айтди.
Шерифнинг айтишича, Ливелсбергернинг танаси таниб бўлмайдиган даражада куйиб кетгани сабабли, тўлиқ расмий идентификация учун ДНК таҳлили ўтказиш зарур. Бироқ, жасадда сержант Ливелсбергерникига ўхшаш иккита татуировка аниқ кўриниб турибди.
Маҳаллий коронер (ўлим сабабларини аниқловчи судья) Ливелсбергер ўзини отиб ўлдирганини маълум қилди. Тергов хулосасига кўра, у портлашдан бир неча сония олдин ўз жонига қасд қилган.
Мен бу ҳолатни ишонч билан ўз жонига қасд қилиш деб айтишим мумкин, шундан сўнг дарҳол бомба портлаши содир бўлган, деди шериф Макмахилл.
Пентагон вакили Ливелсбергернинг махсус кучлар жангчиси эканини тасдиқлади ва унинг таътилда бўлганини маълум қилди. Федерал қидирув бюроси гумонланувчининг машинани портлатиши сабаби ҳозирча номаълум эканини айтди. У Cybertruck автомобилини Лас-Вегасдан минг километр узоқликда жойлашган Колорадо штатининг Денвер шаҳрида ижарага олган.
Ёнилғи ва мушаклар солинган пикапнинг портлаши оқибатида қурбонлар қайд этилмаган, етти киши енгил тан жароҳати олган. Терговчиларнинг фикрига кўра, бу қисман Cybertruck кузови портлаш тўлқини ва оловни юқорига йўналтирганига боғлиқ.
Нью Орлеандаги оммавий қотиллик ва Лас-Вегасдаги портлашдан сўнг полиция ҳамда Федерал қидирув бюроси Жаббар ва Ливелсбергер ўртасидаги фақат битта умумий жиҳатни таъкидлади: иккови ҳам Туро компаниясининг веб-сайти орқали пикап ижарага олган. Энди терговчилар яна бир нечта ўхшашликларни топди.
Иккаласи ҳам Шимолий Каролинадаги Форт Брагг (ҳозирги Fort Liberty) базасида хизмат қилган. Fort Liberty — улкан ҳарбий база, у ерда 50 мингдан ортиқ киши хизмат қилади. Бундан ташқари, Жаббор ва Ливелсбергер 2009 йилда Афғонистонда бўлган. Лекин, барибир, улар у ерда учрашгани ҳақида маълумот йўқ.
Ҳозирча ФҚБ Янги Орлеан ва Лас-Вегасдаги воқеалар ўзаро боғлиқ эмас ҳамда Жаббор якка ўзи ҳаракат қилган, деб тахмин қилмоқда.
Изоҳ (0)