Яман пойтахти Сана шимолида портлаш овозлари эшитилди, деб хабар берди Аl Mayadeen мухбири. Телеканалнинг Ямандаги ваколатхонаси раҳбари айтишича, Сана халқаро аэропорти яқинида жойлашган Ал-Дайлами авиабазасига ракета зарбалари берилгани ҳақида хабарлар бор.
Аl Manara телеканали маҳаллий манбалар ва гувоҳларга таяниб, Сана ва Ходейданинг бир қанча ҳудудларида кетма-кет кучли портлашлар содир бўлганини хабар қилмоқда. Телеканал манбаларига кўра, бомбардимон нишонлари Ал-Дайлами авиабазаси, Ходейда аэропорти, шунингдек, қирғоқ радарлари ва кузатув пунктлари бўлган.
Аl Masirah газетаси зарбалар яна АҚШ ва Буюк Британия ҳарбийлари томонидан йўллангани ҳақида хабар берди. CNN америкалик мулозимга таяниб ёзишича, Вашингтон “аввалги кечадан анча кичик миқёсда” қўшимча зарбалар берган. Телеканал суҳбатдошига кўра, нишонлар ҳусийлар қўллаган радар қурилмалари бўлган. АҚШнинг Яманга зарбасини Reuters’га икки амалдор ҳам тасдиқлади.
Пентагоннинг икки расмийси NBC News телеканалига зарбалар АҚШ ҳарбий кемасидан берилганини, уларнинг нишони радар бўлганини айтди.
60 дан ортиқ объектлар нишонга олинди: ҳаво ҳужумидан мудофаа тизимлари, радарлар, омборлар, дронлар ва ракеталарни учириш майдончалари, деб хабар берди АҚШ Марказий қўмондонлиги.
Ҳусий раҳбариятининг матбуот котиби Абдулла бин Амер, агар зарбалар давом этса, гуруҳ АҚШ ва Буюк Британиянинг Яқин Шарқдаги базаларига ҳужум қилиш билан жавоб қайтаришни ваъда қилди.
Буюк Британия ва АҚШ Ғарб давлатларининг ҳаракатларини ўзини ўзи мудофаа қилиш ва Қизил денгиздаги ҳусий ҳужумларига жавоб деб атади.
Россия, Туркия ва Эрон ҳужумни қоралади. Нью-Йоркда Фаластин ва Яманни қўллаб-қувватловчи намойиш бўлиб ўтди, унда бир неча юз киши иштирок этди.
Изоҳ (0)