Олмазор тумани прокуратураси терговчиси ҳам 20 минг АҚШ доллари миқдорида пора олган вақтда ушланди. Бу ҳақида ЎзА хабар берди.
Терговчи Тошкент шаҳрининг Олмазор тумани прокуратураси томонидан тергов ҳаракатлари олиб борилаётган жиноят иши доирасида гумонланувчи сифатида жалб қилинган шахсга нисбатан қамоққа олиш тарзидаги эҳтиёт чораси қўлламаслик масаласини мазкур туман прокуратураси мансабдор шахслари орқали ҳал қилиб бериш эвазига 30 минг АҚШ доллари талаб қилиб, шундан 20 минг АҚШ долларини олган вақтида ушланди.
Тезкор тадбир давом эттирилиб, масъулияти чекланган жамият юристининг автомашинасида Олмазор тумани прокуратураси терговчиси ундан ушбу пул маблағини пора сифатида олган вақтида ашёвий далиллар билан ушланиб, ҳолат процессуал тартибда расмийлаштирилди.
Ҳозирда прокуратура терговчисига нисбатан Жиноят кодексининг 210-моддаси 3-қисми “а” банди билан, масъулияти чекланган жамият юристига нисбатан эса Жиноят кодексининг 212-моддаси 3-қисми “б” банди билан жиноят иши қўзғатилиб, тергов ҳаракатлари олиб борилмоқда.
Аввалроқ Чортоқ тумани прокурорининг катта ёрдамчиси 2400 АҚШ доллари олган вақтида ушлангани хабар қилинганди.
Шунингдек, Наманганда ФВБ бошлиғи 160 минг доллар олаётганида ушланган.
Поп тумани фавқулодда вазиятлар бўлими бошлиғи бу пулни ўзининг 5 нафар оила аъзоларига лимон етиштириш учун иссиқхона ташкил этиш мақсадида ажратилган 2 гектар ерни мансабдор танишлари орқали харидор номига расмийлаштириб бериш ва у ерда коттежлар қуриши учун рухсат олиб бериш эвазига олган.
Шунингдек, Самарқанд вилояти ИИБ катта тезкор ходими 10 минг доллар олган вақтида ушланган.
Бу пулни жиноят иши қўзғатилган фуқарога нисбатан эса уй қамоғи эҳтиёт чорасини қўллаган ҳолда уни озодликда қолдириш эвазига олган.
Изоҳ (0)