Ижтимоий тармоқларда фуқаро С.А. вақтинча сақлаш ҳибсхонасида сақлангани ҳамда Данғара тумани прокуратурасида тергов ўтказилаётган вақтда унга тиббий ёрдам кўрсатилмагани ҳақида хабарлар эълон қилинди. Ҳолат юзасидан Фарғона вилояти прокуратураси изоҳ берди.
Аниқланишича, электрга ноқонуний улаш ишларини бажариш эвазига мансабдор шахслар С.А. ва М.А. фермер хўжалиги раҳбаридан 29,2 миллион сўм пул олиб, фермер хўжалигининг жами 132,2 миллион сўмлик электрдан ноқонуний фойдаланишига шароит яратиб берган.
Мазкур ҳолат юзасидан Данғара тумани прокуратурасида ўтказилган дастлабки тергов давомида С.А. 2022 йил 3 июнь куни Жиноят кодексининг 210-моддаси (пора олиш) 2-қисми «в», «г» бандлари, 1852-моддаси (электр, иссиқлик энергияси, газ, водопроводдан фойдаланиш қоидаларини бузиш) 3-қисми билан гумон қилинувчи тариқасида жалб этилиб, процессуал тартибида ушланган ва Қўқон шаҳри ИИБ вақтинча сақлаш ҳибсхонасига жойлаштирилган. Жиноят ишлари бўйича Данғара тумани судининг 4 июндаги ажрими билан С.А.га уй қамоғи эҳтиёт чораси қўлланган.
С.А. ва бошқаларга нисбатан бўлган жиноят иши юзасидан дастлабки тергов якунланиб, 23 июнь куни айблов хулосаси билан ЖИБ Данғара туман судига юборилган. Терговда С.А. белгиланган тартибда ҳимоя ҳуқуқи билан таъминланган, тергов жараёнида ва вақтинча сақлаш ҳибсхонасида бўлган вақтда унинг соғлиғи ҳолати юзасидан бирор-бир шикоят ёки илтимоснома келиб тушмаган.
Ҳозирги кунда жиноят иши судда кўрилмоқда. Айнан суд ишни кўриб чиқиши давомида бундай хабарлар тарқатилиши суд ишига аралашиш ва иш жараёнига таъсир ўтказиш деб баҳолаймиз. Шу ўринда таъкидлаш жоизки, қонунчиликда тергов ва суд ишларига аралашиш, яъни унинг ҳар томонлама, тўла ва холисона ўтказилишига тўсқинлик қилиш мақсадида суриштирувчи, терговчи ёки прокурорга ёхуд адолатсиз ҳукм чиқарилишига эришиш мақсадида судьяга турли шаклда қонунга хилоф равишда таъсир ўтказганлик учун тегишли жавобгарлик белгиланган, — дейилади муносабатда.
Изоҳ (0)