Навоий вилоятида гиёҳванд моддалар савдоси билан шуғуллангани учун жиноий жавобгарликка тортилаётган шахсга ишни пул эвазига енгиллаштириб беришни ваъда қилган аёл қўлга олинди. Бу ҳақда вилоят ИИБ ахборот хизмати хабар берди.
Қайд этилишича, 51 ёшли асли самарқандлик М.А. 2023 йилнинг февраль ойида гиёҳванд модда савдоси билан шуғуллангани аниқланган ва унга нисбатан терговга қадар суриштирув ишлари олиб борилган. Бундан хабар топган таниши Р.А. терговчи билан гаплашиб кўргани, 100 миллион сўм эвазига уни жавобгарликдан озод қилиб беришини ва олдиндан 10 миллион, кейин қолганини олиб келишини айтган.
М.А таниши Р.А.га айтилган пулни олиб келган, бир неча кундан кейин эса ўзига нисбатан Жиноят кодексининг 273-моддаси 12-қисми билан жиноят иши қўзғатилганидан хабар топган. Р.А. бўлса уни турли асоссиз гаплар билан алдаб, яна 10 миллион олиб келса, жазосини енгиллаштириб беришини, акс ҳолда узоқ муддатга қамалиб кетишини айтиб қўрқитган. Шундан сўнг аёл М.А.дан яна 10 миллион пулларини олаётган вақтида Шахсий хавфсизлик бош бошқармаси ходимлари томонидан қўлга олинган.
Айни пайтда Р.А.нинг қилмишига қонуний баҳо берилди, унга нисбатан Жиноят кодексининг 168-моддаси (фирибгарлик) 1-қисми ҳамда 211-моддаси (пора бериш) 1-қисми билан жиноят иши қўзғатилган.
“Терговга қадар суриштирувлар натижасида М.А.нинг гиёҳванд моддалар савдоси билан шуғуллангани юзасидан суриштирув ишлари олиб бораётган ҳеч бир ИИБ ходимининг мазкур ишга алоқаси йўқлиги аниқланди”, — дейилади хабарда.
Эслатиб ўтамиз, шу йилнинг февраль ойида Оҳангарон прокуратура биноси қоровули шаҳар прокуратураси терговчисининг иш юритувида бўлган жиноят иши доирасида терговга жалб қилинган фуқаро Э.дан жиноят ишини енгиллаштириб, ижобий ҳал қилиб бериш эвазига 9 минг доллар олган вақтида ушланганди. 2022 йилнинг октябрида эса Фарғона ва Тошкент вилоятларида жиноят ишларини ижобий ҳал қилиб беришни ваъда қилган шахслар қўлга олинган эди.
Изоҳ (0)