Қирғизистон парламенти диний қонунчиликни кучайтирувчи ҳужжат лойиҳасини қўллаб-қувватлади. Қонунга киритилаётган тузатишлар фуқаронинг шахсини аниқлашга имкон бермайдиган кийим кийганлик учун жарима солишни назарда тутади, деб ёзади АКИпресс.
Қонун лойиҳасида диний асосда сиёсий партиялар ташкил этиш ва уларнинг диний фаолиятда иштирок этиши ҳам тақиқланади.
Қонун лойиҳасига кўра, давлат муассасаларида ёки жамоат жойларида ўз шахсини яширувчи кийим кийганлик учун 20 минг сом миқдорида жарима назарда тутилган. Истиснолар меҳнат фаолияти ва тиббий кўрсаткичлар билан боғлиқ ҳолатларда қўлланилади. Диний обидаларда сайловолди ташвиқотлари, йиғилишлар ва бошқа сиёсий тусдаги тадбирлар ўтказганлик учун ҳам жисмоний шахсларга ҳам шундай жарима белгиланди. Юридик шахслар учун жарималар 65 минг сомни ташкил қилади.
Қонун лойиҳасида, шунингдек, айрим жамоат жойларида, жумладан, мактабгача таълим ва умумтаълим муассасаларида, шунингдек, турар жой биноларига борганида диний адабиётларнинг тарқатилишига қарши чоралар кўриш назарда тутилган.
Диний асосда камситиш учун жисмоний шахслар учун 20 минг сом, юридик шахслар учун 65 минг сом миқдорида жарима солинади.
Ҳужжат Қирғизистон президенти Садир Жапаровга имзолаш учун юборилди.
Аввалроқ Садир Жапаров Европарламент аъзоларини мамлакат ишларига аралашмасликка ва унда содир бўлаётган воқеаларга холис баҳо беришга чақирганди.
“Биз мустақил давлатмиз, шунинг учун жараёнларимизга аралашишнинг ҳожати йўқ”, деди у.
Бир неча кун аввал Европарламент Қирғизистон социал-демократик партияси (СДП) етакчиси Темирлан Султонбековни қўллаб-қувватлаб чиққанди. У маҳаллий сайловлар олдидан сайловчиларга пора берганликда гумонланиб, икки партиядоши билан бирга ҳибсга олинган. Шундан сўнг Социал-демократик партия сайловда иштирок этишдан четлатилган.
Садир Жапаровнинг сўзларига кўра, СДП аъзоларининг қилмишлари жиноят бўлиб, уларни кечириб бўлмайди.
Изоҳ (0)