Андижонда туман прокурори ўринбосари ва терговчи, Самарқандда прокурор ёрдамчиси қамоққа олинди (видео)

ДХХ Андижонда туман прокурор ўринбосари ва ёрдамчини, Самарқандда эса прокурор ёрдамчисини пора олаётганда қўлга олди, деб хабар бермоқда ЎзА.

Маълум қилинишича, Андижон вилояти Хўжаобод туман прокуратураси терговчиси туман ички ишлар бўлимининг тергов бўлими томонидан Жиноят кодексининг 168 (фирибгарлик) ва 228-моддалари (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан қўзғатилган жиноят иши бўйича гумонланувчига нисбатан қамоққа олиш тарзидаги эҳтиёт чорасини қўлламаслик ва тергов ҳаракатлари давомида енгиллик яратиб бериш эвазига 5 минг АҚШ доллари талаб қилган.

ДХХ ходимлари томонидан вилоят прокуратураси билан ҳамкорликда ўтказилган тезкор тадбирда терговчи сўралган пулни умумий овқатланиш масканида олган вақтида ашёвий далиллар билан ушланган.

Ҳолат юзасидан вилоят прокуратураси томонидан Жиноят кодексининг 168 ва 211-моддалари (пора бериш) билан жиноят иши қўзғатилди. Тергов жараёнида терговчига ушбу пулларни олиш бўйича кўрсатмани туман прокурори ўринбосари бергани тўлиқ исботланиб, у ҳам қамоққа олинган.

Самарқанд вилоятида кузатилган ҳолатда эса Паст Дарғом тумани прокурори ёрдамчиси туман ички ишлар бўлимининг тергов бўлими томонидан тергов ҳаракатлари олиб борилган жиноят ишида айбланувчи сифатида ўтаётган фуқарога нисбатан суд жараёнида енгиллик қилиш ва суд идораларида ишловчи танишлари орқали қамоқдан чиқариш эвазига, унинг қариндошларидан 3 минг АҚШ доллари талаб қилган.

ДХХ ходимлари томонидан Самарқанд шаҳрида ўтказилган тезкор тадбирда, прокурор ёрдамчиси сўралган пулдан 2500 АҚШ долларини олган вақтида ашёвий далиллар билан ушланган.

Ҳозирда ҳолат юзасидан мазкур мансабдор шахсга нисбатан вилоят прокуратураси томонидан Жиноят кодексининг 168 ва 211-моддалари билан жиноят иши қўзғатилиб, қамоққа олиш тарзидаги эҳтиёт чораси қўлланилган.