Сирдарё вилоятининг Мирзаобод туманида маҳкумларни пул эвазига озодликка чиқариб беришни ваъда қилган шахс аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Мирзаобод туман бўлими томонидан терговга қадар текширув ўтказилган. Унда М.П. исмли шахс фуқаро А.нинг ишончига кириб, унинг танишлари бўлган Жиззах вилоятида жойлашган манзил колониясида жазо муддатини ўтаётган маҳкумлар О. ва Х.ни кафиллик тўлови орқали озодликка чиқариб беришни ваъда қилгани аниқланган. Бунинг эвазига М.П. 136 миллион сўм пулини пластик картага ўтказиш орқали қўлга киритган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Қорақалпоғистонда маҳкумни озодликка чиқариб бериш учун 10 минг доллар сўраган ҳамшира ушлангани, Сурхондарёда 19 йилга қамалган маҳбусни 70 минг доллар эвазига қамоқдан чиқариб бермоқчи бўлган шахс ушлангани хабар қилинганди. Шунингдек, Жиззахда маҳкум ўзини Президент Администрацияси ходими деб таништириб, жиноят содир этгани, Навоийдаги қамоқхонада «Ҳизб ут-Таҳрир» тарафдори маҳкумларга террористик ғояларни тарғиб қилгани маълум қилинган.
Изоҳ (0)