Olmazor tumani prokuraturasi tergovchisi ham 20 ming AQSH dollari miqdorida pora olgan vaqtda ushlandi. Bu haqida O‘zA xabar berdi.
Tergovchi Toshkent shahrining Olmazor tumani prokuraturasi tomonidan tergov harakatlari olib borilayotgan jinoyat ishi doirasida gumonlanuvchi sifatida jalb qilingan shaxsga nisbatan qamoqqa olish tarzidagi ehtiyot chorasi qo‘llamaslik masalasini mazkur tuman prokuraturasi mansabdor shaxslari orqali hal qilib berish evaziga 30 ming AQSH dollari talab qilib, shundan 20 ming AQSH dollarini olgan vaqtida ushlandi.
Tezkor tadbir davom ettirilib, mas’uliyati cheklangan jamiyat yuristining avtomashinasida Olmazor tumani prokuraturasi tergovchisi undan ushbu pul mablag‘ini pora sifatida olgan vaqtida ashyoviy dalillar bilan ushlanib, holat protsessual tartibda rasmiylashtirildi.
Hozirda prokuratura tergovchisiga nisbatan Jinoyat kodeksining 210-moddasi 3-qismi “a” bandi bilan, mas’uliyati cheklangan jamiyat yuristiga nisbatan esa Jinoyat kodeksining 212-moddasi 3-qismi “b” bandi bilan jinoyat ishi qo‘zg‘atilib, tergov harakatlari olib borilmoqda.
Avvalroq Chortoq tumani prokurorining katta yordamchisi 2400 AQSH dollari olgan vaqtida ushlangani xabar qilingandi.
Shuningdek, Namanganda FVB boshlig‘i 160 ming dollar olayotganida ushlangan.
Pop tumani favqulodda vaziyatlar bo‘limi boshlig‘i bu pulni o‘zining 5 nafar oila a’zolariga limon yetishtirish uchun issiqxona tashkil etish maqsadida ajratilgan 2 gektar yerni mansabdor tanishlari orqali xaridor nomiga rasmiylashtirib berish va u yerda kottejlar qurishi uchun ruxsat olib berish evaziga olgan.
Shuningdek, Samarqand viloyati IIB katta tezkor xodimi 10 ming dollar olgan vaqtida ushlangan.
Bu pulni jinoyat ishi qo‘zg‘atilgan fuqaroga nisbatan esa uy qamog‘i ehtiyot chorasini qo‘llagan holda uni ozodlikda qoldirish evaziga olgan.
Izoh (0)