Самарқанд шаҳрида содир этган жинояти учун жавобгарликдан қутулиб қолиш мақсадида терговчига 3 минг доллар пора беришга уринган аёл қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, 30 июль куни Самарқанд шаҳри бўйича ИИО ФМБ ходимлари томонидан ўтказилган тезкор тадбирда Самарқанд шаҳар Боғдод кўчасида яшовчи 45 ёшли С.Ш. яшаш хонадонида фоҳишахона ташкил этгани аниқланган ва ҳолат юзасидан жиноят иши қўзғатилган.
С.Ш. қўзғатилган жиноят иши юзасидан Самарқанд шаҳри бўйича ИИО ФМБ 3-сон ИИБ Тергов бўлинмаси терговчиси ёнига келиб, унинг ишини пул эвазига ижобий томондан ҳал қилиб беришини сўраб, 3 минг доллар миқдоридаги пулларни пора тариқасида таклиф қилган.
Ходим унга пора бериш жиноят эканини бир неча маротаба тушунтиришига қарамай, С.Ш. 28 август куни 3 минг долларни бериш учун келишини айтиб кетган.
Ҳолат юзасидан терговчи ИИБ бошлиғи номига билдирги билан мурожаат қилган.
Билдиргига асосан, 28 август куни ИИВ ШХББ ҳудудий бўлинмалари Самарқанд вилоят бўйича бошқармаси ҳамда Самарқанд шаҳар прокуратураси томонидан тезкор тадбир ўтказилиб, фуқаро С.Ш. терговчига 3 минг доллар миқдоридаги пулларни пора тариқасида берган вақтида ушланиб, ҳужжатлаштириб олинган.
Ҳолат юзасидан жиноят иши қўзғатилиб, тергов ҳаракатлари олиб борилмоқда.
Аввалроқ Тошкентда вазирликда ишлашини айтиб, ўқишга киритиб қўйиш эвазига фуқародан 10 минг доллар олган шахс ушлангани, Сурхондарёда 1 млн сўм пора олмаган ЙПХ инспектори телевизор билан мукофотлангани, Сурхондарёда 10 млн сўм эвазига эр-хотин ажримини тезлаштиришни ваъда қилган сохта адвокат қўлга олингани тўғрисида хабар берилганди.
Изоҳ (0)