Тошкент шаҳрида ҳамкорликда ўтказилган тезкор тадбир давомида Давлат статистика қўмитаси ходими пора билан қўлга тушди. Бу ҳақда ИИВ матбуот хизмати хабар берди.
Маълум қилинишича, 2 март куни Тошкент шаҳар ИИББга корхоналардан бирининг раҳбари ариза билан мурожаат қилган. У ўзи раҳбарлик қилаётган фирма ҳақида Статистика қўмитасининг электрон ҳисобларига реквизитлар хатолик билан киритилгани сабабли Давлат статистика қўмитаси Тошкент шаҳар бошқармасига мурожаат қилганида, бошқарма бошлиғи ўринбосарларидан бири фирманинг СТИР рақамларини тўғрилаб, электрон ўзгартириш киритиш учун 200 доллар беришини талаб қилаётганини билдирган.
Мазкур мурожаатга асосан, шу куни Тошкент шаҳар ИИББ ЖҚБ Коррупция ва иқтисодий жиноятларга қарши курашиш бўлими ҳамда бошқа ҳуқуқни муҳофаза қилувчи орган ходимлари билан ҳамкорликда тезкор тадбир ўтказилган.
Тадбир давомида Давлат статистика қўмитаси Тошкент шаҳар бошқармаси бошлиғининг ўринбосарларидан бири ариза муаллифидан 200 долларни олган вақтида ашёвий далиллар билан ушланган.
Ҳолат юзасидан Тошкент шаҳар ИИББ ҳузуридаги Тергов бўлими томонидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Олмалиқда тадбиркордан қарийб 10 млн сўм пора олган бош муҳандис ушлангани, Тошкентда терговчи 1000 доллар, профилактика инспектори эса 300 доллар пора билан қўлга тушгани, Сурхондарёда ҳоким ёрдамчиси 5,5 млн сўм пора олаётганда ушлангани тўғрисида хабар берилганди.
Мавзуга доир:
- Қашқадарёда бош шифокор 500 минг сўм, агроинспекция инспектори эса 3 млн сўм пора билан қўлга тушди
- Қорақалпоғистонда фуқарога балиқ етиштиришга мўлжалланган кўл ва 200 гектар ерни расмийлаштириб бермоқчи бўлган шахс ушланди
- Бухорода тадбиркорнинг ноқонуний фаолият юритишига рухсат бериш эвазига ундан ойига 500 минг сўмдан пул ундириб келган солиқчи қўлга олинди
Изоҳ (0)