Қуйидаги симптомларни сезсангиз, дарҳол шифокорга мурожаат қилинг.
Кўкрак атрофидаги тери ўзгариши
Бу кўпинча саратон эмас, сут безлари шиши бўлиши мумкин. Шунга қарамай, агар шу ёки бошқа аломатларни сезсангиз, текширувдан ўтинг. Симптомларнинг сабабини аниқлаш учун шифокор қўшимча текширув (маммография ёки ультратовуш) тайинлайди. Баъзан биопсия (текшириш учун тўқималарнинг кичик қисмини олиш) талаб қилиниши мумкин.
Холларнинг пайдо бўлиши
Агар хол ҳажми, шакли, ранги ўзгарган бўлса ёки янги хол пайдо бўлса, дарҳол шифокорингизга мурожаат қилинг. Бу саратон касаллигининг умумий белгисидир — тўлиқ текширувдан ўтишингиз керак.
Сийдик ва ахлатда қон келиши
Агар бу аломатни бир неча кундан ортиқ кузацангиз, шифокорга мурожаат қилинг. Кўпинча қонли ахлат геморрой белгиси, аммо йўғон ичак саратони ҳам бунга сабаб бўлиши мумкин. Сийдик йўли орқали қон келиши ҳам одатда сийдик пуфаги ва буйрак саратонининг биринчи белгисидир. Аммо ваҳима қилишга шошилманг, бу сийдик пуфагининг яллиғланиши — цистит бўлиши ҳам мумкин.
Лимфа тугунларининг ўзгариши
Лимфа тугунлари кичик, думалоқ ёки ловия шаклидаги тузилмалардир. Лимфа турли органлардан келиб, улар орқали оқади. Улар одатда юқумли касалликлар пайтида кўпаяди. Аммо саратоннинг айрим турларида, масалан, лейкемия ва лимфомада шишади ва нозиклашади. Агар шиш бир ойда ҳам кетмаса, шифокорга мурожаат қилинг.
Ютиш қийинлашиши
Бу баъзида бўлса, хавотирланишга ҳожат йўқ. Аммо тез-тез содир бўлса ва қусиш ёки вазн йўқотиш билан бирга келса, томоқ, қизилўнгач ва ошқозон саратони учун текширувдан ўтиш керак.
Бундай ҳолда, эндоскопия (шланг ютиш), бўйин, кўкрак ва қорин компьютер томографияси буюрилади. Барий суспензияси ёрдамида рентген текшируви буюрилиши мумкин: бемор махсус суюқлик ичади ва рентгенограммада қизилўнгач ва ошқозон текширилади.
Вазн йўқотиш
Агар диета ва машғулот режимини ўзгартирмаган бўлсангиз, сабабсиз вазн йўқотиш танадаги муаммоларни кўрсатади, айниқса, 5 килодан ортиқ озган бўлсангиз.
Бироқ бунинг сабаблари стресс ёки қалқонсимон без касалликлари бўлиши ҳам мумкин. Аммо саратон касаллигини истисно қилиб бўлмайди: ошқозон ости бези, йўғон ичак, ошқозон ёки ўпка саратонида ҳам сабабсиз вазн йўқотилади.
Жиғилдон қайнаши
Кўпинча бу ортиқча овқатланиш, спиртли ичимликларни ҳаддан ташқари истеъмол қилиш ёки стресс туфайли юзага келади. Бундай пайтда рационингизни ўзгартиринг ва бир-икки ҳафта кутинг. Агар жиғилдон қайнаши кетмаса, шифокор билан маслаҳатлашинг.
Тез-тез, узоқ давом этадиган жиғилдон қайнаши ошқозон ва қизилўнгач саратони аломати бўлиши мумкин. Жиғилдон қайнаши саратон касаллигидан келиб чиқмаса ҳам ошқозон кислотасининг тўпланиши қизилўнгачнинг шиллиқ қаватига зарар етказади.
Оғизда доғлар пайдо бўлиши
Оғиз ва лабларингизда сариқ, кулранг, оқ ёки ёрқин қизил доғ бор-йўқлигини текширинг. Буларнинг барчаси оғиз саратони ҳақида сигнал бериши мумкин. Текширувдан ўтиш учун тиш шифокори билан боғланинг.
Юқори ҳарорат
Узоқ вақт давом этадиган юқори ҳарорат лейкемия ҳақида сигнал бериши мумкин. Шифокорга боришни кечиктирманг.
Чарчоқ
Албатта, бу ҳолат кўпинча ишдаги стресс ёки доимий ҳаракат билан изоҳланади. Аммо узоқ вақт шундай давом этса, бу нормал ҳолат эмас.
Агар ҳорғинлик дам олишдан кейин ҳам ўтиб кетмаса ёки бошқа аломатлар, масалан, қонли ахлат билан бирга келса, шифокорга, биринчи навбатда эндокринологга мурожаат қилинг.
Йўтал
Йўтал одатда уч-тўрт ҳафтадан кейин ўз-ўзидан кетади. Агар у узоқроқ давом этса, шифокорга боришни кечиктирманг. Айниқса, нафас қисилишидан азият чексангиз. Агар йўталганингизда қон келса, дарҳол касалхонага боринг.
Депрессия
Депрессия ва саратоннинг айрим турлари, масалан, ошқозон ости бези саратони ўртасидаги боғлиқликни кўрсатадиган тадқиқотлар мавжуд. Бундан ташқари, баъзи ҳолларда депрессия белгилари ташхис қўйишдан аввал ёки бошқа белгилардан олдин пайдо бўлади. Бу жуда камдан кам ҳолларда содир бўлади, шунинг учун дарҳол ваҳимага тушманг. Бунда имкон қадар тезроқ текширувдан ўтиш керак.
Изоҳ (0)