Британия суди ичида биткоинлар бўлган қаттиқ дискни топиш учун шаҳар полигонини қазишга рухсат беришни талаб қилган уэлслик фуқаронинг даъвосини кўриб чиқишдан бош тортди.
Уэлснинг Ньюпорт шаҳрида яшовчи Жеймс Ҳоуэллснинг таъкидлашича, 2013 йилда унинг севгилиси ўша пайтда ичида 7,5 мингга яқин биткоин бўлган қаттиқ дискни тасодифан чиқиндига ташлаб юборган. Ушбу криптовалютанинг бугунги курсдаги нархи 700 миллион доллардан ортиқ.
У маҳаллий кенгашдан ё полигонни қазишга рухсат беришни ёки тегишли миқдорда товон тўлашни талаб қилди. Бироқ судья даъво ҳуқуқий асосга эга эмас, деб қарор қилди.
Ньюпорт расмийларининг тушунтиришича, қонунга кўра, ташлаб юборилган қаттиқ диск барибир полигон эгаларининг мулкига айланган бўларди. Бундан ташқари, экология қоидаларига кўра, чиқиндихонада ҳар қандай қазиш ишлари тақиқланган.
Ҳоуэллс, агар қидирув муваффақиятли бўлса, маҳаллий кенгашга биткоинларни сотишдан тушган даромаднинг 10 фоизини ваъда қилди, аммо бу таклиф мансабдор шахсларни қазиш ишларини молиялаштиришга мажбурлашга уриниш сифатида баҳоланди.
Ҳоуэллснинг қаттиқ диски ётган полигонда жами 1,4 миллион тоннадан ортиқ чиқинди бор. Бироқ уэлслик мутахассис ўз дискини полигоннинг айнан қаеридан излаш кераклигини аниқлашга муваффақ бўлганини даъво қилмоқда. У айтаётган ҳудудда 100 минг тонна чиқинди бор.
“Бу қарор мени ҳеч нарсасиз қолдирди. Энди менда сариқ чақа ҳам йўқ”, деди Ҳоуэллс суд қарори ҳақида. “Мен Буюк Британиянинг бузғинчи адолат тизимининг яна бир қурбонига айландим”.
“Мени очкўз деб ҳисобламаслигингиз керак, мен даромадни баҳам кўришга тайёрман. Лекин ҳокимиятдагилардан бирортаси ҳам мен билан одатдагидек гаплашишга тайёр эмас”, дея шикоят қилди Ҳоуэллс.
Гарчи полигонда ётавериб қаттиқ дискнинг корпуси занглаб кетган бўлса ҳам, у, катта эҳтимол билан, дискдан керакли маълумотларни чиқариб олишига ишонишини маълум қилди.
Биткоин нима?
Биткоин — ўтказмаларни қайд қилиш учун шу номдаги бирликдан фойдаланадиган пиринг тўлов тизими. Тизимнинг ишлаши ва ҳимояланишини таъминлаш учун криптографик усуллар қўлланади, лекин шу билан бирга, тизим манзиллари ўртасидаги ўтказмалар ҳақидаги барча маълумотлар очиқ ҳолда мавжуд бўлади.
Икки томон ўртасидаги электрон тўлов воситачиларсиз амалга оширилади ва жараённи ортга қайтариб бўлмайди — тасдиқланган ўтказмаларни бекор қилиш механизми йўқ.
Турли манбалар биткоинларни турли номлар билан таснифлашади. Энг кенг тарқалган вариантлар: криптовалюта, виртуал валюта, рақамли валюта, электрон нақд пул.
Биткоин нархи қанча?
2024 йилнинг декабрь ойида АҚШнинг сайланган президенти мамлакатда стратегик нефть захирасига ўхшаш стратегик биткоин захирасини яратиш режаларини эълон қилганидан сўнг, биткоиннинг нархи рекорд даражада ошиб, 106 минг долларга етди.
Изоҳ (0)