Binance дастурий таъминотдаги муаммолар сабаб савдоларни бир неча соатга тўхтатди

Дунёдаги энг йирик криптовалюта биржаси Binance дастурий таъминотдаги носозлик туфайли бугун, 24 март куни барча спот савдоларни бир неча соатга тўхтатди. Бу ҳақда Financial Times хабар бермоқда.

Маълум муддатга депозит ва пул ечиб олиш ҳам тўхтатилган. Узилишлар ортидан биткоин дарҳол 500 доллар атрофида арзонлашди. Binance бош директори Чангпенг Чжао савдодаги узилишлар эҳтиёт чораси эканлигини маълум қилган. 

Ўтган йиллар давомида Binance бутун дунё бўйлаб регуляторлар томонидан текширилди. 2021 йилда Буюк Британиянинг Молиявий бошқарув идораси ҳисоботда тўлиқ маълумот бермаганлиги сабабли компанияни самарали тартибга солиш мумкин эмаслигини таъкидлади. 

Март ойи бошида Binance 22 майдан бошлаб Буюк Британия мижозлари учун депозит ва пул ечиб олишни тўхтатиб қўйишини эълон қилди.

Ва шу йилнинг 8 февралидан бошлаб, Binance сабабини тушунтирмасдан, номаълум муддатга АҚШ долларида омонат қўйиш ва маблағларни ечиб олишни тўхтатди. Ўшанда компания “ойлик фаол фойдаланувчиларимиз 0,01 фоизи АҚШ доллари банк ўтказмаларидан фойдаланади”, деб таъкидлаган эди. 

Бундан ташқари АҚШ адвокати криптовалюта биржаси ноқонуний операциялар учун ишлатилган деган шубҳалар туфайли 2018 йилдан бери Binance’га қарши жиноий тергов олиб бормоқда.