Бугун, 11 апрель куни биткоин 2022 йилнинг 10 июнидан бери биринчи марта 30 минг доллардан ошди. Бу ҳақда “Дарё”га CoinDesk порталидан маълум бўлди.
Тошкент вақти билан 07:21 га келиб дунёдаги энг йирик криптовалюта 30 381 долларгача баҳоланди. Криптовалюта бир кунда тахминан 7 фоизга, бир ҳафта ичида 9 фоизга қимматлашган.
Bitbank таҳлилчиси Юя Хасегава март ойи учун АҚШ истеъмол нархлари индексининг эълон қилиниши биткоиннинг ўсиши учун катализатор бўлиши мумкинлигини таъкидлади. Инфляция маълумотлари эртага 12 апрель куни эълон қилинади.
Тошкент вақти билан соат 11:00 га келиб биткоин нархи 29 937 доллар бўлиб турибди.
Биткоин нархи ўзининг энг юқори кўрсаткичидан 50 фоиздан кўпроқ пастлигича қолмоқда — 2021 йилнинг ноябрида криптовалюта 69 000 доллардан кўпроққа баҳоланган эди. Шундай бўлса ҳам йил бошидан бери биткоин 80 фоиздан кўпроқ қимматлашган.
Бир ой олдин, 10 март куни биткоин нархи 20 000 доллардан пастга тушиб, 13 январдан бери энг паст даражага тушганди.
Криптовалюталар, жумладан, биткоинлар сотуви АҚШ фонд бозорида пасайишни келтириб чиқариши мумкин.
Изоҳ (0)