Хитой ҳукуматининг криптовалюта соҳасига нисбатан киритган янги талаблари майнерларни ўз фаолиятини қандай қилиб кенгайтириш ва бошқа мамлакатларга бориш ҳақида ўйлашга ундади, деб ёзади Bloomberg’га таяниб Spot. Айни ҳолат дунёдаги энг йирик криптобиржаси бўлган ва йирик майнинг майдонини бошқарадиган Binance компаниясида ҳам кузатилди.
«BTC.com» маълумотларига кўра, биткоинни майнинг қилишда ишлатиладиган ҳисоблаш бирлиги – ҳешрейт сўнгги бир неча ҳафта ичида тахминан 40 фоизга камайди. Бунга Хитой ҳукуматининг майнерларга қўйган янги талаблари ҳам таъсир қилгани бўлиши мумкин.
Агар ҳозирда биткоинларнинг 65 фоизи Хитойдаги майнинг фермаларида олинишини ҳисобга олинса, юқоридаги кўрсаткич тез орада 50 фоиз ва ундан пастроққа тушиши мумкин. ETF Amplify Transformational Data Sharing таҳлилчиларига кўра, хитойлик майнерлар яқин орада АҚШ, Канада, Швеция, Аргентина ва Марказий Осиёдаги мамлакатларга кўчиб ўтиши мумкин.
Яқинда крипто валюта майнинги бўйича етакчи компания бўлган BIT Mining Limited Қозоғистонга майнинг ускуналарининг биринчи партиясини етказиб бергани ҳам буни қисман тасдиқлайди. Мамлакатда максимал ҳаш кучи 18,2 PH/секунд бўлган 320 та ускуна 27 июнга қадар ишга туширилади. Иккинчи ва учинчи партия 1 июлга қадар етиб келиши кутилмоқда.
Хитойлик майнерлар Қозоғистон билан чекланиб қолмаслиги мумкин. Президент Шавкат Мирзиёев 2018 йилда «Рақамли иқтисодиётни ривожлантириш тўғрисида»ги фармонни имзолагандан сўнг мамлакат майнерларни хурсанд қиладиган имижга эга бўлди.
Гарчи ушбу фармоннинг оз қисми амалга оширилган ва майнингни легаллаштириш ҳали тўлиқ ҳал этилмаган бўлса-да, Ўзбекистон ҳали ҳам жаҳон стандартлари бўйича электр энергияси тарифларининг пастлиги сабабли потенциал жозибали жой бўлиб қолмоқда, дейилади хабарда.
Бундан аввал Қозоғистонлик майнерлар солиқлар сабаб Ўзбекистонга кўчиб ўтиши мумкинлиги ҳақида хабар берилганди.
Изоҳ (0)