23 январь куни биткоин (BTC) курси 23 минг доллардан ошди. Савдо давомида у 23,14 минг долларгача етди. Бу аввалги кун охирига нисбатан деярли 2 фоизга юқори.
Биткоиннинг барқарор ўсиши кетма-кет тўртинчи ҳафта давом этмоқда, шу вақт ичида у беш ой олдинги даражасига қайтди. Бошқа криптовалюталар ҳам йил бошидан буён барқарор ўсишни кўрсатяпти.
Тошкент вақти билан 24 январь, соат 12:20 га келиб дунёдаги энг қиммат криптовалютанинг нархи 23 123 доллар бўлиб турибди.
Биткоиннинг бозор қиймати август ўрталарида 500 млрд доллардан юқори бўлиб турганди. Кейинчалик криптовалютанинг бозор қиймати 300 млрд долларгача пасайди. Айни пайтда бу кўрсаткич 445 млрд долларга тенг ва кўпайиб бормоқда.
2021 йил ноябрь ойида биткоин нархи 69 минг долларгача кўтарилган эди.
Криптовалюта бозоридаги оптимизм АҚШда инфляциянинг пасайиши ва Хитойда карантин чораларининг юмшатилиши фонида инвесторлар кайфиятининг умумий яхшиланиши билан боғлиқ.
Декабрь ойида АҚШда истеъмол нархлари ўтган йилнинг шу даврига нисбатан атиги 6,5 фоизга ўсди, бу ноябрь ойига нисбатан 0,6 фоиз пунктига ва июнь ойидаги энг юқори чўққига нисбатан 2,6 фоиз пунктига камайди.
Изоҳ (0)