Тошкентда рақамли криптовалюта савдоси билан ноқонуний шуғулланган шахслар ушланди, деб хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Маълум қилинишича, фуқаро Д.К. «Р.» исмли шахс билан олдиндан тил бириктириб, рақамли криптовалюта савдоси билан ноқонуний шуғулланиб, 1В (биткоин) электрон пул бирлигини 49 670 долларга баҳолаб, 0,45 (биткоин) электрон пул бирлигига ўзининг 5 фоиз устама фойдасини қўшиб ҳисоблаб, 0,45 (биткоин) электрон пул бирлигини келишилган «электрон ҳамён»га ўтказиб берган.
Эвазига харидордан 23 400 доллар ва 800 минг сўмни олган вақтида департаментнинг Шайхонтоҳур туман бўлими томонидан ДХХ билан ҳамкорликда ўтказилган тезкор тадбирда ашёвий далиллар билан ушланган.
Ҳолат юзасидан Д.К. ва «Р.» исмли шахсларга нисбатан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) ва 190-моддаси (фаолият билан лицензиясиз шуғулланиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, Шавкат Мирзиёевнинг 2018 йил 2 сентябрда қабул қилинган «Ўзбекистон Республикасида крипто-биржалар фаолиятини ташкил этиш чора-тадбирлари тўғрисида»ги қарорига мувофиқ, Ўзбекистонда крипто-биржалар фаолияти ташкил этишга рухсат берилган. Аммо крипто-биржалар фаолиятини амалга ошириш учун лицензиялар Ўзбекистон ҳудудида шўъба ёки бошқа турдаги ташкилотларни очиш асосида фақатгина чет эл юридик шахсларига берилади.
Ўзбекистонда крипто-биржалар фаолиятини амалга оширишга биринчи лицензия Кореянинг Kobea Group компаниясига берилган.
Аввалроқ Тошкентда қонунга хилоф равишда 224 000 долларга криптовалюта сотган шахс қўлга олингани, биткоин савдоси билан ноқонуний шуғулланиб, 3 миллион доллар айирбошлаган шахс қўлга олингани ҳақида хабар берилган эди.
Изоҳ (0)