Машҳур криптовалюта биткоиннинг нархи 2024 йил 11 март куни 71 минг доллардан ошди. Маълумотлар Binance биржасида эълон қилинди.
Янгилик эълон қилинган пайтда биткоин 71 227 долларга тенг эди. 24 соат ичида ўсиш 2,62 фоизни ташкил этди. 10 март куни биткоин 69 692 долларга баҳоланган эди. Бошқа криптовалюталарнинг нархи ҳам ошган:
- Ethereum (ETH): 4 006,20 доллар, 24 соат ичида ўзгаришлар +1,64 фоиз.
- BNB (BNB): 528,40 доллар, 24 соат ичида ўзгаришлар +4,33 фоиз.
- Dogecoin (DOGE): 0,176665 доллар, 24 соат ичида ўзгаришлар: +0,24 фоиз.
2024 йилнинг 5 мартида биткоин тарихидаги энг юқори даражага етгани ҳақида хабар берилган эди. Ўшанда унинг Binance биржасидаги нархи 69 минг доллардан ошган.
Яқинлашиб келаётган ҳалвинг биткоин нархига қандай таъсир кўрсатади?
Биткоин ҳалвинг криптовалюта ҳамжамиятида ҳар тўрт йилда бир марта содир бўладиган муҳим воқеа. Бу ҳодиса ҳар 210,000 блокда ёки тахминан ҳар тўрт йилда содир бўладиган биткоин сиёсатининг ажралмас қисми, ҳалвингдан сўнг тангаларни ишлаб чиқариш тезлиги пасаяди ва майнерлар мукофоти тенг ярмига камаяди. Биткоин асосчиси Сатоши Накамото унга қизиқишни доимий равишда сақлаб қолиш учун чекланган эмиссия ва ҳалвингни ўйлаб топган. Агар ҳар бир ҳалвингдан кейин биткоин олиш қийинлашса, унинг қиймати ошади. Демак, ҳалвинг инфляцияни назорат қилиш ва танқисликни келтириб чиқариш учун мўлжалланган.
Навбатдаги биткоин ҳалвинг тахминан 2024 йил апрель—май ойларида бўлиб ўтади. Бу ҳодиса оммавий ахборот воситаларида катта шов-шувга айланиб, биткоинга бўлган қизиқишни янада ошириши кутилмоқда. Chase Bank таҳлилчиларининг прогнозларига кўра, келаси йилги ҳалвингдан сўнг биткоин нархи 120 000 долларгача чиқиши мумкин. 2024 йилда ҳалвинг жуда муҳим, чунки бу йилда биткоин инфляция даражаси ниҳоят олтин даражасидан пастга тушади ва бу уни энг ноёб пулга айлантиради.
Изоҳ (0)