Биткоин нархи 23 минг доллардан ошди

Биринчи марта энг машҳур криптовалюта – биткоиннинг нархи 23 минг долларлик чегарани кесиб ўтди. Бу ҳақда 17 декабрь куни CoinDesk маълумотларига таяниб, «Korrespondent.net» хабар қилди.

Биткоин нархи қисқа вақт ичида 10 фоизга ошиб, 23 770 АҚШ долларга етди. Бироқ ушбу даражага кўтарилгандан сўнг кейинги 30 дақиқада крипто валюта курси 1500 доллардан кўпроққа тушиб кетиб, 22 185 доллар бўлди. Тошкент вақти билан соат 18:00 дан бошлаб биткоиннинг нархи 23 151 долларни ташкил этди.

Биткоиннинг бозор капиталлашувининг умумий қиймати 428 миллиард АҚШ долларидан ошди ва унинг улуши бутун жаҳон криптовалюта бозорининг 60 фоизидан ортиғини ташкил этмоқда.

Эслатиб ўтамиз, 16 декабрь куни биткоин нархи 20 минг доллардан ошиб, тарихий рекорд ўрнатди.

Сўнгги ҳафталарда крипто валюта нархи кескин кўтарилди. Октябрь ойининг бошларида биткоин, тахминан, 11 минг АҚШ долларга тенг эди. Йил бошидан бери криптовалюта нархи уч бараварга ошди.