Биткоин нархи июндан бери илк бор 26 минг доллардан ошди

Бугун, 14 мартда биткоин 2022 йилнинг 13 июнидан бери илк бор 26 минг доллардан ошди. Бу ҳақда “Дарё”га CoinDesk криптобиржасидан маълум бўлди. 

Тошкент вақти билан 18:05 ҳолатига кўра, биткоин 26 448 доллар бўлиб турибди. Сўнгги 24 соат ичида криптовалюта нархи 15 фоиздан кўпроққа ўсди.

Биткоин нархи сўнгги 4 кун ичида кетма-кет ўсиб бормоқда. Ўсиш кўрсаткичи — 28 фоиз.

Маълумотларга кўра, криптовалюталарнинг бозор капиталлашуви сўнгги 24 соат ичида 5,8 фоизга ўсиб, 1,12 триллион долларни ташкил этди.

Тахминларга кўра, бу АҚШ президенти Жо Байден бутун банк секторига ёрдам бериш учун зарур бўлган ҳамма нарсани қилишга ваъда берганидан кейин содир бўлди.

Шунингдек, АҚШдаги Silicon Valley Bank банкрот бўлганидан сўнг, инвесторларнинг молиявий ташкилотлардан кўра криптовалюталарга бўлган қизиқиши ортди. Шу фонда биткоин нархи ошмоқда.

Аввалроқ биткоин нархи икки ой ичида биринчи марта 20 000 доллардан пастлагани ҳақида хабар берилганди.