АҚШ Молия вазирлигининг хорижий активларни назорат қилиш бошқармаси (OFAC) Bittrex биткоин биржасини Россия, Эрон, Судан ва Сурияга нисбатан санкцияларга риоя қилмагани учун 24 миллион доллар жаримага тортди. Бу ҳақда АҚШ Молия вазирлиги сайтидаги хабарда айтилади.
OFAC Bittrex Қрим, Куба, Эрон, Судан ва Суриядаги фойдаланувчилар учун 2014 йилнинг мартидан 2017 йилнинг декабрига қадар виртуал валюта операцияларини тўхтатмаганлигини аниқлади. Ушбу ўтказмалар миқдори 263 миллион долларга баҳоланмоқда.
Биржа Вашингтоннинг Беллевю шаҳрида рўйхатдан ўтган. АҚШнинг Россияга қарши санкцияларига мувофиқ, АҚШ компанияларига Россия компаниялари ёки фуқаролари билан битимлар тузишга рухсат берилмайди.
Дунё бўйлаб фаолият юритаётган виртуал валюта биржалари ўз мижозлари кимлигини ва улар қаерда эканлигини тушунишлари керак, — дейди OFAC директори Андреа Гакчи.
Bittrex криптовалюта биржаларининг CoinGecko рейтингида савдо ҳажми (кунига 15,2 миллион доллар) бўйича 76-ўринда.
2021 йил февраль ойида OFAC BitPay процессинг хизматини Қрим, Шимолий Корея ва Эрондан келган фойдаланувчилар иштирокидаги транзакциялар учун 500 минг доллар жаримага тортганди.
Аввалроқ Европа Иттифоқи россияликларнинг криптоактивларига хизмат кўрсатишни тақиқлаган эди.
Изоҳ (0)