«Дарё» нашри 26 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия бўйлаб ҳарбий тайёргарлик марказлари очилади
Владимир Путинга Россияда Чеченистон мисолида мамлакат бўйлаб ҳарбий тайёргарлик марказларини очиш таклиф қилинди. Марказларни очишни Россия бош вазири ўринбосари, Россия президентининг Узоқ Шарқ федерал округидаги ваколатли вакили Юрий Трутнев ва Россия президенти маъмурияти раҳбарининг биринчи ўринбосари Сергей Кириенко таклиф қилган.
«Кириенко ва мен Владимир Путинга йигитларни тайёрлаш учун шу каби ўқув марказларини яратиш таклифи билан мурожаат қилдик. Гудермесда бундай ишлар амалга оширилган, у бугунги кунда нафақат Чеченистон, балки Россиянинг салмоқли қисми учун ҳам ўқув марказига айланди. Биргаликда бу ишни давом эттирамиз, бошқа ҳудудларда марказлар ташкил қиламиз», — деди Трутнев.
Унга кўра, марказлар Гудермесдаги Россия махсус кучлари университети асосчиларидан бири Даниил Мартинов ёрдамида яратилади.
Ғарб Украина масаласида воситачими ёки провокаторми?
Туркия президенти Ражаб Тоййиб Эрдўғоннинг фикрича, Ғарб Россия—Украина можаросини ҳал қилиш учун ҳаракат қилмаган, аксинча, «фақат провокациялар» билан шуғулланган. Унинг иддао қилишича, зиддият томонлари ўртасида воситачилик ролини Туркия зиммасига олган.
Эрдўғон таъкидлашича, Европа Украинадан экспорт қилинадиган доннинг 44 фоизини олган. 16 фоизи Туркияга, 14 фоизи Африка давлатларига юборилган.Туркия президенти, шунингдек, Россия билан биргаликда ўғитларни экспорт қилиш бўйича чоралар кўришга ваъда берди ва бу масала «ишнинг энг оғир қисми» бўлишини айтди.
Уруш бошида Россия ва Украина ўртасида тинчлик музокаралари Туркия воситачилигида ўтган, бироқ май ойида улар тўхтатилганди. Ёзда Туркия ва БМТ воситачилигида томонлар Одесса портларидан Украина ғалласини экспорт қилиш, шунингдек, Россиянинг озиқ-овқат ва ўғитларини четга чиқариш йўлидаги тўсиқларни бартараф этишни ўз ичига олган дон битимини тузишга муваффақ бўлди.
Ғарб давлатлари сўнгги пайтларда Украинанинг «адолатли дунё»га интилиш ҳақидаги баёнотларини қўллаб-қувватламоқда. Владимир Зеленский Россия қўшинларининг Украина ҳудудидан 1991 йилги чегаралар доирасида, жумладан Қримдан олиб чиқиб кетилишини талаб қилмоқда. Москва ҳисоблашича, Киевнинг ёндашуви унинг тинч йўл билан келишувга тайёр эмаслигини кўрсатади.
Ҳужумчи дронлар Кореялараро чегараларни кесиб ўтмоқда
2017 йилдан буён биринчи марта Шимолий Корея томонидан учирилган дронлар кореялараро чегарани кесиб ўтгач, Жанубий Корея бунга жавобан огоҳлантириш мақсадида ўт очди. Тревога бўйича ҳавога кўтарилган КА-1 енгил ҳужумчи самолётларидан бири ҳалокатга учради, дея хабар бермоқда Ёнхап.
Агентлик маълумотларига кўра, ҳарбийлар ҳарбий демаркация чизиғидан шимол томондан парвозларни қайд этган ва учувчисиз учар қурилмаларни аниқлаган. Уларнинг сонига аниқлик киритилмаяпти. Шимолий Корея учар қурилмалари Кёнгидо провинциясида Кимпхо, Пажу туманлари ва Канхва оролини кесиб ўтган.
Шундай воқеалар фонида Жанубий Корея Транспорт вазирлиги Кимпхо ва Incҳхон халқаро аэропортларига парвозларни тахминан бир соатга тўхтатиб қўйди. Бу қарор сабабларини идора маълум қилмади.
Sinxua агентлиги маълумотларига кўра, Жанубий Корея Ҳарбий-ҳаво кучлари самолёти Канвондо провинциясининг Хенсон округига қулаб тушган. Бортда бўлган икки учувчи катапульта қилиб, ўзларини қутқаришга муваффақ бўлган.Жанговар самолёт дала ҳудудига қулаган, тинч аҳоли орасидаги қурбонлар ҳақида маълумот берилгани йўқ.
Расул Кушербаевнинг депутатлик ваколати муддатидан олдин тугатилди
Олий Мажлис Қонунчилик палатаси депутати Расул Кушербаевнинг депутатлик ваколати муддатидан олдин тугатилди. 26 декабрь куни Марказий сайлов комиссиясининг навбатдаги мажлисида Кушербаевнинг ваколатларини муддатдан олдин тугатиш масаласи кўриб чиқилди. Комиссия аъзолари бир овоздан унинг мандатини тугатишни қўллади.
Тадбиркорлар ва ишбилармонлар ҳаракати — Ўзбекистон Либерал демократик партиясининг аъзоси бўлган Расул Кушербаевнинг депутатлик ваколати унинг ёзма аризасига мувофиқ муддатидан илгари тугатилди.
«Ўзбекистон Республикаси Олий Мажлиси Қонунчилик палатаси депутати ва Сенати аъзосининг мақоми тўғрисида»ги Ўзбекистон Республикаси қонунининг 4-моддасига мувофиқ Олий Мажлис Қонунчилик палатаси депутатининг ваколати муддатидан олдин тугатилиши учун депутат «у ўз ваколатларини зиммасидан соқит қилиш ҳақида ёзма ариза» бериш ҳуқуқига эга.
Олий Мажлис Қонунчилик палатаси депутати дахлсизлик ҳуқуқига эга бўлиб, унинг қарорларига ҳеч бир давлат органи таъсир ўтказиш ҳуқуқига эга эмас.
Изоҳ (0)